Xabar berganimizdek, «Bunyodkor» kecha Minskdagi o‘quv-yig‘in mashg‘ulotlarini boshladi.
Mashg‘ulotlar «Minsk» klubi maydonida o‘tkazildi. Aniqrog‘i, «Minsk» jamoasiga qarashli mashg‘ulot maydonlaridan biri «Bunyodkor» uchun ajratilgan. Mashg‘ulotlar yengil tarzda o‘tkazildi. Futbolchilar maydon bo‘ylab yugurishdi, tanani qizdiruvchi mashqlarni bajarishdi, «kvadrat» o‘ynashdi, yana yugurishdi va darvozabonlarning mahoratini sinovdan o‘tkazishdi. Bu tabiiy hol. Sababi, O‘zbekiston Liga Kubogi bahslaridan keyin jamoa a’zolari ta’tilga chiqqan, bir haftalik tanaffusdan keyin endigina mashg‘ulotlar boshlandi. Kechagi mashg‘ulotlarda Islomjon Qobilov yakka tartibda shug‘ullandi. Boisi, himoyachi birinchi davraning so‘nggi turlari arafasida jarrohlik stoliga yotishga majbur bo‘lgan edi. Shundan beri birinchi marta mashg‘ulotlarga qo‘shildi.
Darvozabonlar Murodjon Zuhurov, Abdumavlon Abdujalilov va Eldor Adhamov bilan tajribali mutaxassis Abdusattor Rahimov shug‘ullandi.
Bugundan mashg‘ulotlar ikki mahaldan o‘tkaziladi. Qolaversa, rejadan kechki ovqatdan so‘ng nazariy mashg‘ulotdan ham o‘rin olgan.
