Yoshlar o‘rtasida sportning futbol va mini-futbol turlarini keng ommalashtirish, mahallalarda istiqomat qilayotgan iqtidorli yoshlarni saralash ishlarini amalga oshirish, ularni sport-sog‘lomlashtirish tadbirlariga keng jalb qilish, tibbiy va jismoniy madaniyatni rivojlantirish maqsadida mahalla yoshlari o‘rtasida mini-futbol bo‘yicha “Charm to‘p” an’anaviy turniri o‘tkaziladi.

O‘zbekiston futbol assosiasiyasi, Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika kengashi, O‘zbekiston kasaba uyushmalari federasiyasi, O‘zbekiston Milliy teleradiokompaniyasi va O‘zbekiston Milliy axborot agentligi hamkorlikda mamlakatimizdagi barcha mahalla fuqarolar yig‘inlarida 13-14 yoshli o‘smirlar o‘rtasida mini-futbol bo‘yicha “Charm to‘p” an’anaviy turnirini tashkil etadi. Mazkur musobaqa joriy yilning iyul-avgust oylarida bo‘lib o‘tishi ko‘zda tutilgan.

Musobaqa 5 bosqichda o‘tkaziladi:

1-bosqich — mahalla va mahallalararo bosqichi (22 – 25 iyul kunlari);  

2-bosqich — tuman va shahar bosqichi (29-31 iyul kunlari);

3-bosqich — viloyat bosqichi (9-11 avgust kunlari);

4-bosqich — mintaqaviy (hududlararo) bosqich (16-18 avgust kunlari);

5-bosqich — Respublika final bosqichi (24-27 avgust kunlari).

Mazkur musobaqaning mahallalararo bosqichi 22 iyuldan e’tiboran start oldi. 25 iyulda tuman va shahar bosqichiga yo‘l olgan jamoalar nomlari ma’lum bo‘ladi.