Xorvatiyaning Zagreb shahrida o‘tkazilayotgan dzyudo bo‘yicha Gran-pri musobaqasining birinchi kun bellashuvlarida medallar uchun kurashuvchi sportchilar nomi ma’lum bo‘ldi.
E’tiborlisi, kechki dasturda ikki nafar hamyurtimizda turli probali medallarni qo‘lga kiritish imkoniyati mavjud.
-60 kilogramm vazn toifasida Sharofiddin Lutfillayev dastlab Sloveniya, keyin Turkmaniston, Qozog‘iston va Mo‘g‘iliston terma jamoasi vakillarini mag‘lub etib, final yo‘llanmasini qo‘lga kiritdi. Hamyurtimiz musobaqa g‘olibligi uchun britaniyalik Eshli Makkinziga qarshi tatamiga chiqadi.
-66 kilogramm vazn toifasida Muhriddin Tilovov yarim finalgacha bo‘lgan yo‘lni muvaffaqiyatli bosib o‘tdi. Ammo final uchun kechgan kurashda ispaniyalik Alberto Gaiteroga imkoniyatni boy berib qo‘ydi. Tilovov endi shohsupaga ko‘tarilish uchun fransiyalik Kilian le Blushni mag‘lub etishi talab qilinadi.
