Aralash jang san’ati (MMA) bo‘yicha o‘rta (-84 kg) vaznda oktagonga chiqadigan o‘zbekistonlik Mahmud Muradov (22-6, 14 KO) 27 iyul kuni navbatdagi jangini o‘tkazdi. Bu haqda GoSport.uz internet-nashri muxbiri xabar bermoqda.

Chexiyaning Praha shahrida OKTAGON 13 turniri doirasida tashkil etilgan mazkur jangda Muradov braziliyalik Vendell Oliveyraga (31-13, 16 KO) qarshi oktagonga chiqdi. Jangning ikkinchi raundida Muradov tomonidan berilgan ketma-ket zarbalar natijasida hakam jangni to‘xtatdi texnik nokautni qayd etdi. Natijada Mahmud Muradov o‘zining faoliyatidagi 22-g‘alabasini tantana qildi.

Ma’lumot uchun, “Jang mashinasi“ laqabli 36 yoshli Vendell MMAning eng nufuzli turnir sanalgan UFC yo‘nalishi sobiq jangchisi sanaladi. U 2014-15 yillarda mazkur turnir doirasida ikkita jang o‘tkazib, ularning ikkalasida ham nokaut evaziga imkoniyatni boy berib qo‘ygan.

Eslatib o‘tamiz, OKTAGONMMA turniri bilan shartnomaga ega bo‘lib turgan Muradov bunga qadar so‘nggi marta 8 iyun kuni OKTAGON 12 turniri doirasida, braziliyalik boshqa bir sobiq UFC jangchisi Alberto Emiliano Pereyraga (13-4, 11 KO) qarshi oktagonga chiqib, raqibini birinchi raunddayoq nokautga uchratgandi.