«PSJ» sport direktori Leonardo hujumchi Neymarga xayfsan e’lon qildi.

Sport.es tarqatgan xabarga ko‘ra, Leonardo 15 iyul, dushanba kuni ta’tildan jamoa safiga kech kelib qo‘shilgan Neymarni boshqa futbolchilar oldida qattiq koyib bergan. U bundan keyin har qanday yulduz o‘yinchiga alohida imtiyoz berilmasligini ma’lum qilgan. Mazkur intizomsizlik uchun «PSJ» Neymarni maksimal jarimaga tortishga qaror qilgan.

Neymar esa Leonardoga o‘ziga xos uslubda "javob" qaytardi. Xitoydagi yig‘inning birinchi kunida mashg‘ulot maydonchasiga tashrif buyurgan sport direktori bilan barcha futbolchilar ko‘rishib chiqishdi, ammo braziliyalik futbolchi vatandoshi bilan so‘rashishdan ochiqchasiga bosh tortgan.

Eslatib o‘tamiz, "PSJ" va "Renn" o‘rtasidagi Fransiya superkubogi o‘yini bugun Xitoyda bo‘lib o‘tadi. Katta ehtimol bilan Neymar unda maydonga tushmaydi. U jamoan tark etishni istamoqda. Unga «Barselona» va «Real» klublari da’vogarlik qilishmoqda.