AGMK bosh murabbiyi Mirjalol Qosimov "Navbahor" ustidan qozonilgan g‘alabadan keyin matbuot anjumanida quyidagi fikrlarni bildirdi:

— Avvalambor, butun O‘zbekiston ahlini, muxlislarni AGMK jamoasi nomidan Qurbon Hayiti bayrami bilan tabriklayman. O‘yinga keladigan bo‘lsak, bahs juda ham qiziqarli o‘tdi. Stadiondagi muhit va maydon holati ham ajoyib darajada edi. Kurashlarga boy o‘yinni ko‘rdik. Qolaversa, omadimiz ham keldi. Birinchi bo‘lim boshida, ya’ni, Kasyan birga-bir chiqib, gol urganida bahs boshqacha bo‘lishi mumkin edi. Yigitlarimiz esa oxirigacha kurashib, xarakter ko‘rsatishdi. Oldin ham, hozir ham aytaman, vodiyda «Navbahor»ga qarshi o‘ynash juda ham qiyin kechadi. Sababi, muxlislarning 12-o‘yinchi bo‘lib qo‘llab-quvvatlashi futbolchini yugirishga majbur qiladi. So‘nggi vaqtlarda «Navbahor»ga ozgina omad yetishmayapti. O‘ylaymanki, keyinchalik barchasi o‘z joyiga qaytadi. Biz ham muxlislarga yoqadigan o‘yin namoyish qilishni xohlamoqdamiz. Jamoamiz hali yangi va ular bir-birini tushunib ketishi uchun ozgina vaqt kerak. Bugungi natijadan qoniqdim, o‘yinni esa kuchaytirishimiz lozim.