Poytaxtimizda qilichbozlik bo‘yicha «Satellit» xalqaro musobaqasi start oldi. Tokio olimpiadasi uchun muhim reyting ochkolarini qo‘lga kiritish imkonini beradigan turnirning ilk kunida erkaklar rapira qurolida kurashga kirishdilar.
Musobaqaning dastlabki oltin medali turkiyalik qilichboz Martino Minutoga nasib etdi. Turkiyalik rapirachi hal qiluvchi bellashuvda rossiyalik Ivan Troshinni 15:8 hisobida mag‘lub etishga muvaffaq bo‘ldi. Yarim finalda imkoniyatni boy bergan qozog‘istonlik Tamirlan Kaliyev hamda singapurlik Kevin Chan bronza medali bilan taqdirlanishdi.
Ayni paytga kelib, ayollar o‘rtasida ham bahslar o‘zining qizg‘in pallasiga kirgan. Quvonarlisi, unda ikki nafar hamyurtimiz yarim final bosqichigacha yetib bordi. Kechki dasturda final yo‘llanmasi uchun kechadigan bahsda Umida Ilyasova rossiyalik Marta Martyanova bilan, Yana Alborova esa italiyalik Marta Kammilletti bilan ro‘baro keladi.