«Barselona» hujumchisi Lionel Messi Yevropa chempionlar ligasi haqida o‘z fikrlarini bildirib o‘tdi.

YECHLdagi raqiblar haqida
«Chempionlar ligasi har yili bir xil saviyada bo‘ladi, ammo ba’zida unda g‘olib chiqish qiyinroq bo‘ladi. Ushbu musobaqada faqat eng kuchlilar yig‘ilgan. Bu holat uni o‘ziga xos musobaqaga aylantiradi.

Bizning guruhda «Borussiya» bor. Men "Barselona" safida o‘ynayotganimdan beri bu jamoaga to‘qnash kelmaganmiz. Ularning stadionini televizor orqali ko‘rganman. Muxlislarning o‘zini tutishi menga yoqqan edi.

Shuningdek, «Inter» bilan ham to‘qnash kelamiz. Bu jamoa o‘tgan mavsumda ham o‘ynagan edik, ammo men jarohat tufayli safarda o‘yinda maydonga tusha olmagan edim. Bu qiyin guruh, ammo biz uchun qiziqarli sinov bo‘ladi».

«Barselona» haqida
«Boshqa jamoalar haqida fikr yurita olmayman. Boisi, men yoshligimda «Barselona» safiga qo‘shilganman. Men biladigan yagona narsa shundan iborat.

«Barselona» – o‘z falsafasi, futbolga nisbatan qarashi, o‘z akademiyasi tufayli o‘ziga xos klub. «Barselona» har bir o‘yinga alohida yondashadi».

Frenki de Yong haqida
«U Chempionlar ligasi va Gollandiya chempionatining o‘tgan mavsumini yaxshi o‘tkazdi. U top-jamoalarga qarshi o‘yinlarda ajralib turdi.

U yaxshi saviyadagi, aqlli va serharakat o‘yinchi. U maydonda yaxshi harakatlanadi va oyoq bilan yaxshi ishlaydi. Bu sifatlar biz uchun qadrli. U bizning tizimga o‘xshash bo‘lgan jamoadan keldi. Shu bois, uning «Barselona»ga moslashishi oson kechadi.

Bosim haqida
«Professional futbolchiga aylanganimga ancha yillar bo‘ldi. Bosimga o‘rganib qolganman. Tanqidning turli toifalari bor. Ulardan ayrimlari xavotirga soladi. Ammo bu o‘yinning bir qismi. Biz buni qabul qilgan holda faqat o‘yin haqida o‘ylashimiz lozim».

«Liverpul»ga jarimadan urgan goli haqida
«Har safar jarimadan bo‘lgani kabi zarba berishga harakat qildim. Masofa odatdagidan uzoqroq edi. Men katta kuch bilan zarba berdim. Ba’zida bu foyda beradi, ba’zida yo‘q. Bu safar omadim keldi va to‘p darvozaga kirdi».