Ispaniya qirollik futbol federasiyasi "Barselona"ga nisbatan ikki xil jazo chorasini qo‘llash variantini ko‘rib chiqmoqda.
Agar "ko‘k-anorranglilar" hujumchi Antuan Grizmann bilan muzokaralarni muddatidan avval boshlagani isbotlansa, jamoaning uy stadioni hisoblangan "Kamp Nou" bitta o‘yinga diskvalifikasiya qilinishi mumkin.
Bu ishni ko‘rib chiqayotgan hakam Xuancho Landaberea "Barsa"ni 300 yevro miqdorida jarimaga tortish variantini ham taklif qildi. Mazkur ish bo‘yicha qaror kelasi haftada e’lon qilinishi kutilmoqda.
Eslatib o‘tamiz, 28 yoshli Grizmann yozgi transfer paytida "Atletiko"dan "Barselona"ga o‘tdi. Kataloniyaliklar fransiyalik futbolchi uchun shartnoma ko‘rsatilgan 120 million yevro miqdoridagi tovon pulini to‘lashdi. Ammo madridliklar futbolchining tovon puli 200 million yevro bo‘lgan paytda "Barsa" Grizmann bilan dastlabki shartnomani imzolagan deb hisoblab, kataloniyaliklardan yana 80 million yevro miqdorida pul undirishni ko‘zlab, Ispaniya futbol federasiyasiga shikoyat kiritgan edi.