Rossiyada davom etayotgan boks bo‘yicha jahon chempionatida chorak final bosqichi janglari boshlandi. Hozirgina eng yengil vaznli (52 kg.) sportchimiz Shahobiddin Zoirov kuchli bokschi — bolgariyalik Daniyel Asenovga qarshi jang olib bordi.

Terma jamoa murabbiylar Asenovning uslubini yaxshi o‘rganib, shunga yarasha taktika tanlagani jang boshidan oxirigacha sezilib turdi. Shahobiddin ring markazini raqibga topshirib, o‘zi oyoqda yaxshi ishladi. Bolgariyalik bokschi bosim uyushtirayotganda Zoirov qarshi hujumda ko‘p zarbalar berdi. Barcha raundlarda o‘zbekistonlik bokschi kichik ustunlikka erishdi. Hakamlarning baholari shunga yarasha bo‘ldi — 5:0 (30:27, 30:27, 29:28, 29:28, 29:28).

Shahobiddin Zoirov yarim finalda fransiyalik Bilol Bennamaga qarshi ringga ko‘tariladi. JCHda ertaga dam olish kuni. Yarim final janglari 20 sentyabr kuni bo‘lib o‘tadi.

Zoirov hisobida bitta olimpiada chempionligi va bitta Osiyo o‘yinlari oltin medali mavjud. U faoliyati davomida ilk marta jahon chempionati medaliga sazovor bo‘ladigan bo‘ldi.