Italiya chempionatining 4-turi doirasida muxlislar Milan derbisiga guvoh bo‘lishdi. «Milan» klubi mezbonlik qilgan bu galgi to‘qnashuvda «Inter» g‘alaba qozondi.

Uchrashuvning 20-daqiqasida D`Ambrozioning zarbasidan keyin to‘p ustun tegib qaytgan bo‘lsa, 40-daqiqada Suso to‘p bilan butun maydonni bosib o‘tdi, jarima maydoniga kirganidan keyin darvozani ishg‘ol eta olmadi.

Ikkinchi bo‘lim boshida esa rekoshet "Inter"ga naf keltirdi. Brozovichning zarbasidan keyin to‘p himoyachiga tegib o‘z yo‘nalishini o‘zgartirdi va olis burchakka borib tushdi. Uchrashuvning 78-daqiqasida esa qanotdan yetkazib berilgan to‘pni Romelu Lukaku bosh bilan Donnarumma qo‘riqlayotgan darvozaga joylab qo‘ydi.

O‘yinning so‘nggi daqiqalarida "Milan" futbolchisi Teoning zarbasidan keyin ustunga tekkan bo‘lsa, "neradzurri" futbolchilari bir martadan to‘sin va ustunni nishonga olishdi.

Shu tariqa, Konte jamoasi 4ta o‘yindan keyin yuz foizli natija qayd etgan holda, jadvalda peshqadamlik qilishda davom etmoqda. "Milan" esa 6 ochko bilan 9-o‘rinda qolmoqda.

Italiya chempionati, 4-tur
Milan – Inter 0:2 (0:0, 0:2)
Gollar: 0:1 – 49 Brozovich, 0:2 – 78 Lukaku.
Milan – Donnarumma, Konti, Musakkyo, Romanyoli, Rodriges (Teo, 72), Kessie, Bigliya, Chalxanoglu (Lukas Paketa, 64), Suso, Piontek, Rafael Leau (Rebich, 83).
Inter – Xandanovich, de Vrey, Shkrinyar, Godin, Brozovich, D`Ambrozio, Asamoa, Barella (Kandreva, 82), Sensi (Vesino, 71), Lukaku, Martines (Politano, 76).
Ogohlantirishlar: Konti (48), D`Ambrozio (82), Rebich (88).