Bugun poytaxtimizda dzyudo bo‘yicha Gran-pri musobaqasining uchinchi kun bellashuvlari bo‘lib o‘tmoqda. Reglamentga ko‘ra, ushbu kun dasturida og‘ir vaznli polvonlar bahs olib boradi.
Ayni paytga kelib, Davlat Bobonov (-90 kg), Alishr Yusupov (+100 kg) va Bekmurod Oltiboyev (+100 kg) kabi bir qator vakillarimiz saralash bosqichidan muvaffaqiyatli o‘tgan bo‘lsalar, shohsupaga ko‘tarilishga asosiy da’vogarlardan sanalgan Muhammadkarim Xurramov (-100 kg), Sherali Jo‘rayev (-100 kg) va Shahzod Sobirov (-90 kg) musobaqani erta tark etishdi. Ta’kidlash joiz, -90 kilogramm vazn toifasida uchinchi davraning markaziy to‘qnashuvi hamyurtimiz Davlat Bobonov va Rio Olimpiadasi chempioni yaponiyalik Mashu Baker o‘rtasida kechadi.
