O‘zbekiston futbol assosiasiyasi birinchi vise-prezidenti Ravshan Ermatovning Namangandagi xizmat safari tafsilotlari bilan tanishtirgan edik. Safarning ikkinchi kunida O‘FA ishchi guruh vakillari Andijon viloyatida bo‘lishdi.

Dastlab Ravshan Ermatov boshchiligida mutaxassislar Andijon shahridagi Bo‘ston dahasida joylashgan Andijon bolalar va o‘smirlar futbol maktabiga tashrif buyurib, yosh futbolchilar bilan uchrashdi va futbol maktabi sharoitlari bilan yaqindan tanishdi. Kelajakda ushbu dargohda futbol akademiyasini tashkil buyicha taklif tayorlash rejalashtirildi. Keyin mutaxassislar Andijon shahri Sho‘rbuloq dahasida joylashgan bolalar va o‘smirlar futbol akademiyasida bo‘lib, ushbu akademiya faoliyati bilan yaqindan tanishdi. Shu yerning o‘zida Ozarboyjonda o‘tgan xalqaro turnirda g‘olib bo‘lgan yoshlarni taqdirlash marosimi bo‘lib o‘tdi.

Shundan so‘ng Andijon shahridagi ixtisoslashtirilgan olimpiya zaxiralari maktab-internati faoliyati o‘rganib chiqilib, ushbu dargohda futbolchilarni qabul qilish kvotalarini ko‘paytirish va qo‘shimcha maydonlar qurish taklifi ilgari surildi. Shuningdek, «Andijon» klubi ishtirok etadigan «Sog‘lom avlod» stadionida maydon holatini yanada yaxshilash bo‘yicha ko‘rsatma berildi. O‘FA ishchi guruhi tomonidan Izboskan, Shahrixon, Asaka, Qo‘rg‘ontepa tumanlari ko‘zdan kechirilib futbol maktablari va akademiyalari barpo etish uchun qulay lokasiyalar belgilab olindi.

Andijon futbolining bugungi holati o‘rganib chiqilgach, tegishli xulosa va rejalarni muxokama qilish maqsadida Ravshan Ermatov Andijon viloyati hokimi Shuhratbek Abdurahmonov bilan uchrashdi va viloyat futbolini rivojlantirish bo‘yicha rejalar borasida suhbatlashdi.