“Paxtakor” himoyachisi Yegor Krimes O‘zbekiston kubogi finalida bo‘lib o‘tgan AGMKga qarshi o‘yin (3:0) borasida o‘z fikrlarini bildirib o‘tdi.

— Ko‘rganingizdek, o‘yin bizning g‘alabamiz bilan o‘z yakuniga yetdi. Uchrashuv to‘liq biz oldindan rejalashtirgandek o‘tdi desam, adashmagan bo‘laman. Biz tezkor gol kiritib olishimiz va raqibni chuqur himoyadan chiqarishimiz talab etilar edi. Buni uddaladik va musobaqada g‘olib chiqdik.

— «Paxtakor»ning o‘yin uslubi qanotlardan hujum qilishga bog‘lanib qolmayaptimi?

— Ochig‘i, biz o‘yin davomida markazdan ham ko‘p bor hujum uyushtiramiz, biroq qanot o‘yinchilarimiz ajoyib harakat qilgani bois, shunday tuyulsa kerak. Hozirda faqat qanotlardan hujum uyushtirish orqali katta maqsadlarga erishishning iloji yo‘q. To‘g‘ri, ayrim uchrashuvlarda Arveladze hujumning katta qismini qanotdan uyushtirishni talab qiladi, ba’zan esa, markazdan yorib kirish uchun Cheranni hujumchi ortiga joylashtiradi.

— Bugun ”Paxtakor” qaysi jabhadagi ustunlik evaziga yirik hisobda g‘alaba qozondi?
— Bugun biz jismoniy ustunlik evaziga yirik hisobda g‘alaba qozondik. E’tibor bergan bo‘lsangiz, raqib ikkinchi bo‘limda bizning pressingga dosh bera olmadi. Agarda birinchi bo‘limda hisobni ochib olmaganimizda o‘yin biz uchun juda qiyin bo‘lishi bilar edik. Shu sababli biz birinchi bo‘limda ehtiyotkorlikni birinchi o‘ringa qo‘ydik. Goldan so‘ng, ular o‘yinga qo‘yilgan vazifani o‘zgartirishga ulgurmasdan ikkinchi golni kiritdik. So‘nggi 20 daqiqada «AGMK» jismonan charchab qoldi. Bugun jismoniy ustunlik o‘z so‘zini aytdi desam, adashmagan bo‘laman.