"Qizilqum" - "Metallurg" uchrashuvidan keyin jamoa bosh murabbiylari ishtirokida matbuot anjumani bo‘lib o‘tdi. Dastavval "Metallurg" ustozi Andrey Shipilov savollarga javob qaytardi.

"Birinchi taymda jamoalar maydonda "uxlashdi". To‘g‘ri, bizda ikkita ajoyib standart bo‘ldi. Bir safar to‘p chiziqni kesib o‘tgandek taassurot uyg‘ondi. Ammo bu holat bo‘yicha aniq xulosa ayta olmayman. Jamoalar xuddi nimanidir kutayotgandek harayeat qilishdi.

Ikkinchi taymni esa juda muvaffaqiyatli boshladik. Tezkor gol urdik. Ortidan yana yuz foizlik imkoniyatga ega bo‘ldik. Biroq shunday vaziyatda hujumchimiz Tumasyanning qarorini tushunmadim. 2:0 bo‘lganda g‘alabaga juda yaqin kelardik. Futbolning o‘zgarmas qonuni bor, "sen gol urmasang, senga urishadi", degan. Mezbonlar bizni qarshi hujumda jazolashdi. Natija o‘yinga mos bo‘ldi. "Qizilqum" ham bugun yaxshi o‘yin ko‘rsatdi, Shodiyev, Ibragimovning harakatlari muxlislarga manzur bo‘ldi. Men esa o‘z jamoamning o‘yinidan unchalik qanoatlanmadim.

Ikkala jamoani ham kuzgi muhim ochkolar bilan tabriklayman", — dedi Andrey Sergeevich.