O‘zbekiston Superligasi 23-turidan o‘rin olgan so‘nggi o‘yinlar yakunlandi. AGMK o‘z maydonida “Lokomotiv” bilan 1:1 hisobida durang o‘ynadi. O‘yindan keyingi matbuot anjumanida mezbonlar yordamchi murabbiyi Xayrulla Karimov ishtirok etdi.
"Yaxshi o‘yin bo‘ldi. Bugungi bahs futbol ishqibozlariga yoqdi deb o‘ylayman. Birinchi bo‘lim jamoamiz uchun qiyin kechdi. Kubok finalidan keyin futbolchilar ruhiy tushkunlikka tushib qolgani sezildi. Lekin tanaffusdan keyin jamoa o‘yinida o‘zgarish ruy berdi. Ikkinchi taymda qator xavfli vaziyatlar yaratildi. Bugungi raqib "Loko" ham yaxshi jamoa. Jamoamiz xarakter ko‘rsatib, hisobni tenglashtirishga erishdi. O‘ylaymanki, tablodagi 1:1 hisobi o‘yin mos va adolatli natija bo‘ldi", -deydi murabbiy.
