Bugun Qibraydagi stadionda AGMK yuzaga kelgan tanaffusdan unumli foydalangan holda Jizzaxning “So‘g‘diyona” klubiga qarshi nazorat uchrashuvini o‘tkazdi.

Superligadagi yuzaga kelgan tanaffusda o‘yin amaliyotini saqlab qolish maqsadida tashkillashtirilgan bahsda Mirjalol Qosimov boshchiligidagi murabbiylar shtabi safdagi barcha futbolchilarga imkoniyat taqdim etdi.

Birinchi bo‘limda AGMK quyidagi tarkibda o‘ynadi:
Sultonov (Abdulov, 30) - Rahmatov, Kasminin, Yo‘ldoshev, Sulaymonov - Baydullayev, Qosimov, Nurmatov - Shixov, Polvonov, Pirimov.
Ikkinchi taymda o‘ynagan tarkib:
Abdulov (To‘rayev, 60) - Jalolov, Rahmonov, Zonich, Sulaymonov (Gulyamov, 58) - Umarov, Jo‘rayev, Abdunabiyev - Toshmatov, Hakimov, Pirimov (Toshpo‘latov, 58)

O‘yinga keladigan bo‘lsak, birinchi bo‘limda o‘yin asosan AGMK ustunligi ostida o‘tdi. Qator yaratilgan vaziyatlardan foydalana olinmadi.

Ikkinchi taymda o‘yin yanada jonlandi. Raqib darvozasi oldida keskin vaziyatlar sodir etishda ham faollik kuzatildi. Lekin yakuniy zarbani berishda yosh futbolchilarga sovuqqonlik yetishmadi.

Mirg‘iyos Sulaymonovning uzoqdan urgan goliga mehmonlar qatorasiga ikkita belgilangan penaltilar orqali javob berishdi. Dastlab Maxaradze penaltini golga aylantirgan bo‘lsa, keyin Sahob Rashidov 11-metrlik jarima zarbasini golga aylantirdi. Uchrashuv yakuniga yaqin esa Javohir Xayrullayev o‘z nomiga gol yozdi.

Shu tariqa rejadan o‘rin olgan dastlabki nazorat o‘yinida “So‘g‘diyona” g‘alaba qozondi.

Qayd etish kerakki, mazkur o‘yinni kichik jarohati tufayli Akmal Shorahmedov, Rasul Yo‘ldoshev hamda mashg‘ulotlarga endigina qo‘shilgan Elguja Grigalashvili o‘tkazib yubordi.

Kelgusi nazorat uchrashuvi “Andijon”ga qarshi 18 noyabr kuni o‘tkaziladi.