Bugungi o‘yindan so‘ng, barchada turli fikr paydo bo‘ldi. Kimdir terma jamoamizni uquvsizlikda ayblagan bo‘lsa, kimdir Abramovning Eronga boy bergan o‘yinini yodga olishni boshladi. Darhaqiqat, bu uslubdagi mag‘lubiyat Karlenichning faoilyatidagi 3-siga aylandi. Mayli, bu hozir muhim emas. Bugun o‘yin atrofida va undagi voqeyalar haqida «dardlashamiz».
Yaratganning hohishi va aybdor izlash kasalligi
Bizda qiziq odat bor. Agar terma jamoamiz mag‘lubiyatga uchrasa, darrov aybdor izlash «marosimi» boshlanib ketadi. To‘g‘ri, ayrim mag‘lubiyatlarda biz tomondan ham xatolar bo‘ladi biroq, bu safargi mag‘lubiyat bundan mustasno. Nega deysizmi? Bugungi terma jamoamiz baliqchi obrazida namoyon bo‘ldi. Biz yaxshi o‘yin ko‘rsatdik, kuchli va shakillangan jamoaga qarshi o‘z uslubimizda harakat qildik, gollar kiritdik, vaziyatlar yaratdik, biroq bugun omad bizdan butkul yuz o‘girdi va ovimiz baroridan kelmadi.
Nega bugungi mag‘lubiyatning alami ko‘plab ijobiy yutuqlarimizni e’tibordan chetda qolishiga majbur qilishi kerak? O‘zingiz o‘ylab ko‘ring. Bugun terma jamoamiz yigitlari anchadan beri muxlislar sog‘ingan hujumkor va tomoshabop futbol ko‘rsatishgani, qanotlar va markaz birdek ishlagani, tezkor qarshi hujumlar, to‘p nazorati singari jabhalardagi yutuqlarimiz ko‘zga tashlanmayapti?
Bugun yigitlar deyarli 40 ming muxlis oldida boshlarini eggancha, biroq bor kuchlarini maydonga tashlab chiqib ketishganini barcha ko‘rdi. Bu mag‘lubiyat guruhdagi vaziyatni og‘irlashtirgan bo‘lsada, futbolimizdagi jiddiy qadam ekanligini unutmaslik lozim. Mag‘lubiyat Abramov va uning shogirdlari uchun juda muhim dars bo‘lishiga ishonchim komil. Yo‘qotilgan 3 ochkodan fojea yasashning xojati yo‘q. Oldinda vaziyatni o‘nglash uchun o‘yinlar yetarli.
Biroz sabrli bo‘laylik
Ushbu mavsum startida “Chelsi” juda chiroyli o‘yin namoyish etgan bo‘lsada, juda ko‘p ochko yo‘qotgani hech kimning yodidan ko‘tarilmagan bo‘lsa, ajab emas. Aristokratlar ustozi Lempard avval chiroyli va hujumkor o‘yinni shakillantirishga urg‘u berdi. Natija esa, mana endi ko‘zga tashlanmoqda. Biroz g‘alati o‘xshatishdek tuyulsada, vaziyat juda o‘xshash. Nima bo‘lgan taqdirda ham Abramov va yigitlarni bugungi o‘yindagi mag‘lubiyati uchun noshudga chiqarib qo‘yish noto‘g‘ri.
Agarda jamoa o‘sishda va shakillanishda davom etsa, Jidda shaxrida bo‘lib o‘tadigan uchrashuvda revansh olishimizga shaxsan men ishonaman. Bugun taqdirning ikkita zarbasidan so‘ng, o‘rnimizdan tura olmasak, hal qiluvchi bosqichga chiqib nima qilamiz? Balki, ushbu bosqichda doim osonlik bilan o‘tib kelganimizga o‘rganib qolgandirsiz, lekin shuni unutmangki, JCH uchun kurash bugundan boshlandi. Bundan avvalgi saralash o‘yinlaridan farqli o‘laroq bu safar kurashga erta kiryabmiz. Umid qilamanki, hal qiluvchi o‘yinlarga qadar yetarlicha zarbalarni qabul qilib olgan termamiz muhim o‘yinlar uchun imunitet hosil qilishga muvaffaq bo‘ladi. Taslim bo‘lishga erta.
Ya . U
