Ispaniya futbol federasiyasi (RFEF) La liga prezidenti Xavyer Tebasdan iste’foga chiqishni talab qildi. Boisi, so‘nggi bir yil ichida federasiya va Liga rahbariyati o‘rtasida bir nechta sud mojarolari bo‘lib o‘tdi.

Mamlakatning yetakchi klublari Federasiya pozisiyasini qo‘llab-quvvatlashiga rahbariyat umid qilmoqda. Sud La liga tomonidan chempionatning 16-turidan o‘rin olgan «Vilyarreal» – «Atletiko» o‘yinini AQSHda o‘tkazish borasidagi da’vo arizasiga rad javobini berganidan so‘ng tashkilotlar o‘rtasidagi ziddiyat kuchayib ketdi.

Bungacha Federasiya prezidenti Luis Rubiales va Tebas o‘rtasida turli masalalarda mojarolar kelib chiqqan edi. Jumladan, chempionat taqvimi, "el-klasiko"ning yangi sanasini belgilash, Liga o‘yinlarini boshqa mamlakatlarda o‘tkazish kabi masalalarda.

RFEF rasmiy saytida e’lon qilingan bayonotda Xavyer Tebas «ichi qora va mas’uliyatsiz» inson sifatida ta’riflangan. Federasiya La liga klublaridan Liga prezidentini zudlik bilan iste’foga chiqarish masalasini muhokama qilishni so‘radi.