White Wolves vs Palestine! Fight!
Bugun BIZga g‘alaba kerak edi!
Bugun 3 ochkoni halollab oldik. Hakam yordami yoki omad tufayli g‘alabaga erishmadik! G‘alaba ayrim futbolchilarimizni individual mahorati va jamoani qattiq ter to‘kishlari hisobiga olindi!
Falastin jamoaviy pressing, individual texnika va jismoniy tayyorgarlik bo‘yicha yaxshi maqomda ekanligini guvohi bo‘ldingiz, men esa buni bugun uchinchi marta guvohi bo‘ldim!
Oldingi Ramallohdagi uchrashuv (bizni halol yengishgandi), o‘tgan turda Yamanga qarshi uchrashuv (deyarli teng kechgan uchrashuvda, markaziy himoyachini “detskiy” xatosi tufayli minimal hisobdagi mag‘lubiyat) va bugungi o‘yin (qattiq mehnat va individual mahorat).
Fikrimcha, jazoirlik murabbiy Nuriddin Uld Ali, jangovor, minimal imkoniyatlardan jazolay oladigan yaxshi, mustahkam himoya chizig‘iga ega jamoa tuzgan va hali jamoani yanada ruhlantirib, Saudiya, Yaman va Singapurga qarshi o‘yinlarda syurprizlar tayyorlash uchun potensiali borligini ko‘rsatdi.
3 ochko havodek zarur bo‘lgan o‘yinda, deyarli ko‘pchiligimiz, oldingi “Saudiya endshpilini” aybini yuvish va Ramallohdagi mag‘lubiyatga, yirikroq hisob bilan javob qaytarilishini kutgandik! Biroq g‘alaba, biz kutganchalik oson va 90 daqiqalik chiroyli o‘yinda erishilmadi!
Yarim himoyadagi teng to‘qnashuvda (!), ayrim futbolchilarimizni texnik mahoratini ishga solib, bergan chiroylari paslari va yakunlovchi mohirona zarbalari evaziga 3 ochkoni egasiga aylandik!
Eldor 5 ta imkoniyatni 2 tasini golga aylantirgan bo‘lsa, Hojiakbar Alijonovni 2 ta super zarbasini, Jalol Masharipovni yerlatib yaqin burchakga tepgan kuchli zarbasini va Doston Hamdamovni “a-lya Zidan”uslubida to‘p bilan joyida bir aylanishda raqibni dog‘da qoldirib, darvozaga yo‘naltirilgan zarbalarini barchasini – falastinlik kiper Rami Hamada qaytardi va gol bo‘lish ehtimolini yo‘qqa chiqardi.
Yaxshi reaksiyaga ega bo‘lgan darvozabon ekan, bo‘lmasam, Hojiakbar Alijonovni 2 marta yaqin masofadagi o‘ng burchakdan tepgan o‘ta kuchli zarbalarini to‘liq va qisman bartaraf qilishga ulgurmasdi (Dima aka Ivankov, k svedeniyu). O‘zi, Falastin ham, aslida ko‘pchilik o‘ylaganidek ochko beruvchi "luzer" jamoa emasligini ko‘rsata oldi. Yarim himoyada, Falastin biz bilan teng o‘ynadi!
Falastinda ichki chempionat haminqadar , tuzuk tabiiy maysali maydon yo‘q, futbol bilan shug‘ullanish uchun tinchlik degan ne’mat yo‘q, lekin yaxshi jamoa bor! Falastin ichki chempionati va Chili, Shveysariya, Misr, Malayziya, Ispaniyani turli divizionlarida to‘p suruvchi futbolchilaridan tashkil topgan yaxshi jamoa shakllangan.
Yutuq o‘zimizniki, kelinglar, bizni jamoamizni sub’ektiv ko‘zga tashlangan kamchiliklarini ob’ektiv tarzda yondoshgan holda ko‘rib chiqamiz:
1. Qush bir qanotda ucha olmaydi yoki nega chap qanot ishlamaydi?!
Falastinga qarshi butun o‘yin davomida, o‘yinni ko‘tarinki ruhda o‘tkazgan Hojiakbar Alijonovni xavfli paslari, uzatmalari oqibatida 1 ta gol urdik, yana bir necha bor shunday yaxshi imkoniyatlardan foydalana olmadik. Bu yaxshi va o‘ng qanotda Davron Hoshimov erasi tugaganidan shaxsan xursandman! Hojiakbar Alijonov siz bizning kelajakdagi “Dani Alvesh”imiz! Chap qanotda qachon “Xordi Alba”mizga ega bo‘lamiz?!
Farrux Sayfiyev hozircha eng yaxshi variant va uni ko‘plab uzatmalari orqali raqib markazidan Eldor gollar urgan. Lekin, Farrux o‘ynamagani uchun, bugun chap qanot ishlamadi. Senyor Kuper (nimagadir uni Mister deb chaqirishardi. Adashmasam, ingliz tilida faqat sharifsiz “Mister”deb murojaat qilishda, xuddi bizning “Hojiaka” deb chaqirishimizga yaqin bo‘lgan munosabat borday) ham, Janob Abramov ham shu chap qanotga Oleshka Zoteevni afzal ko‘rishadi. Oleg “Lokomotiv”da shu chiziqda munosib o‘yin ko‘rsatadi, lekin MTJda bu chiziqda, shaxsan men uchun, ichki chempionatda ham undan kuchli bo‘lgan kamida 3 ta futbolchilar bor.
Ota o‘g‘il Vitaliy Denisovni ham esdan chiqarmaylik, hozir uni ishlari yurishmayapti, afsus. Balkim MTJ yig‘inlariga bir kelib, ona Vatanda bir havo almashtirib ketsa, ishlari yurishib ketarmidi, Maminov kabi. Uning borini berib o‘ynashi uchun ham ardoqlaymizda, Vadim Karlenovich!
Odil chap qanotdan hujum boshlash uchun to‘pni Oleshkaga uzatadi, Oleshka esa, falastinlik bir (!) raqibini yakkama yakka jangda alday olmasligini biladi va to‘pni yana orqaga Odilga qaytaradi va shu kabi effekti pas harakatlar va fikrlar majmuasi...
Jalol Masharipovda dribling va texnika yaxshi, lekin shu chiroyli dribling va texnikani golga olib keladigan o‘z vaqtida yerlatib uzatilgan aqlli, aniq paslari kam..
Shu sabab ham, Farrux Sayfiyev o‘ynagan paytda, Jalolni ushbu chiroyli dribling yurishlarini Farrux yakkunlab qo‘yadi va bu “Paxtakorni” chap qanot artileryasini mevasidir.
Shu o‘yinda esa, “Paxtakorni” o‘ng qanot artileryasidagi H.Alijonov-D.Hamdamov tandemini harakatlari evaziga gol ko‘rdik va yana bir necha yaxshi imkoniyatlarni qo‘ldan chiqardik. Natija va harakat bor, o‘ng qanot joyida!
2. Mister Yelich, ahvollaringiz yaxshimi?!
Ko‘pchilik sezdi, o‘yinni 70-daqiqalaridan keyin yigitlar charchab qolishdi. Bilasizmi nega?! Jismoniy tayorgarlik past degan fikr keldi.
Kuni kecha O‘FFda Prezidentimiz maslahatchisi va Vatanamiz futbol ekspertlari o‘rtasida o‘tkazilgan uchrashuvda, MTJ o‘yinchilarimizni jismoniy ko‘rsatkichlari, jahon standartining bor-yo‘g‘ini 45 foizini tashkil etishini qayd qilingani, bunga qisman misol bo‘la oladi.
Olimpiya terma jamoamizda bu ko‘rsatkich 65%ni tashkil qilar ekan. Nima qilamiz, boridan maksimum ishlash yo‘lini qidiramizda!
Lekin bu ko‘rsatkich va fakt, jamoani jismoniy holatini o‘stirilishiga bahona bo‘lmasligi kerak.
21 asrdagi axborot va texnologiya davrida, bu muammoni, konkret 1 ta o‘yinga yoki qisqa siklga bartaraf qilish yo‘lini boshqa top mutaxassislarni metodikasidan o‘rgansak bo‘ladi, izlansa imkoniyati bor, nima deysiz shu fikriga Mister Yelich?!
Ana, yaqinda termaga chaqirilgan va 90 daqiqa ichida tinim bilmaydigan Sanjar Qodirqulovni andoza sifatida o‘rganib chiqing! Bu yarimi hazil, yarimi chin gap aslida... Lekin, kelinglar vaziyatga real qaraymiz!
Osiyoda kamida 9 ta jamoa bizdan hozir jismonan kuchli: Koreya, Yaponiya, Avstraliya, Eron, Iroq, Qatar, BAA, Saudiya Arabistoni, Vyetnam. Lekin, ular bizni shuning evaziga mag‘lub eta oladi, degan fikrdan yiroqman!
Kuchni aql bilan ishlatish orqali kerakli hisobga erishish mumkin va Falastinga qarshi 75 daqiqadan keyin shunday qilindi! Saudiya darsi yaxshi namuna bo‘ldi!
Yaponlar va karislar bilan 75 daqiqagacha hisobda oldinga borib yoki durang o‘ynab turgan paytimizda, 70-daqiqadan himoyaga “kvadrat” o‘ynashni boshlasak, ular jazolab ketish ehtimoli yuqori. Yechimni faqat charchab qolgan chiziqlarni o‘z vaqtidagi alternativ almashtirishlarda ko‘ryapman! Umuman, aniq metodik qo‘llanmalarga tayanib, aql bilan tayorgarlik ko‘rilsa, effekt albatta bo‘ladi!
Ha aytgancha, kecha yaponlar o‘z maydonida Venesueladan 4 ta yedi, karislar ham Braziliyadan 3 ta! Izlagan, metin qo‘rg‘ondan ham teshik topadi!
3. Eldordan tashqari, yana kimdir gol urishi mumkinmi?!
Eldor jiyan, Goldor Shomurodov, “Goleador 14” – bu bizni sehrli qurolimiz! Xuddi DAN xodimi “sehrli tayoqchasisiz” kabi ishlay olmaganidek, hozirda biz ham Eldorsiz hujumni qanday yakunlash mumkinligini tasavvur qila olmaymiz. Lekin futbol kontaktli sport turi va MTJda hech kim jarohat olish va o‘z vaqtida to‘liq tiklanishdan sug‘urtalanmagan.
Shu sabab, hujum chizig‘imizda Eldorga munosib variantlarni shakllantirib boraverishimiz zarur! Kechagi o‘yinda, Eldor 70-daqiqalarda charchab qolgani ko‘rindi va uning o‘rniga chiqqan Temurxo‘ja, deyarli biror karomati bilan ko‘zga tashlanmadi. To‘g‘ri, unga paslar oshirilmadi va asosan hisobni saqlashga harakat qilindi.
Lekin shu orada qilgan bir ikki hujumdagi uzatmalarda ham, Temurxo‘ja to‘pni bir urinishda o‘ziga to‘g‘irlab darvoza tomon zarba berishga imkon topa olmadi va o‘ziga uzatilgan to‘pni boshqa jamoadoshiga berib yuborib, qandaydir omad, rikoshet tufayli, to‘pni bo‘sh darvozaga kiritish mumkin bo‘lgan vaziyatni kutdi.
MTJda hech bo‘lmasa, har qanday hujumni darvoza tomon zarba bilan yakunlaydigan yoki botinan doimo darvoza tomon zarba berishga tayyor hujumchilar zaxirada bo‘lishi zarur! Hujumchiga uzatmalar kelganda, to‘pni qabul qilishda imkoniyatni raqibiga boy beradigan, raqibni chalg‘itib darvoza tomon zarba berish o‘rniga to‘pni yana orqadagi sherigiga uzatadigan yoki faqat bo‘sh darvozaga gol uradigan hujumchilar bilan Falastin kabi jamoalar bilan ham o‘z uyimizda durang o‘ynab qo‘yish extimoli juda yuqori.
O‘zi MTJdagi yarim himoyachilarimizni deyarli hammalari yaxshi zarbaga ega, lekin sekundlar ichida darvoza tomon kutilmagan zarba berishlar, afsus, kam.
Falastin bilan bo‘lgan o‘yinda Jalol Masharipov va Doston Hamdamov tomonidan kutilmaganda berilgan zarbalar darvozabonga qanday qiyinchilik tug‘dirganini ko‘rdik!
Xulosa:
Bahorgacha vaqt bor, bahorgacha Vadim Karlenovichda jamoani puxtaroq shakllantirishda imkoniyat bor. Shaxsan men murabbiyimiz shu vaqt ichida, jamoani yanada kuchaytirishiga ishonaman!
Sababi, Janob Abramovda gap ko‘p!
Faqat, u buni bildirmaydi!
Hozir esa, bahorgacha 1-o‘rin muborak bo‘lsin vatandoshlar! Balkim, yoqib qolsa, “Oq bo‘rilar” ushbu bosqichni mazkur o‘rinda tugatishar?!
“Bo‘ri"larimizni qorni hali g‘alabalardan to‘ygani yo‘q degan ishonchdamiz va ularni keyingi shov-shuvli g‘alabalardan so‘ng “uvillab yuborishlariga” tilakdoshmiz!
O‘sha gap,
5X5=25! Paks!!
Furqat Qurbonov.
