Top chempionatlarda g‘oliblik uchun kurash olib boradigan jamoalarning yetakchi futbolchisi bo‘lish juda mushkul ekanligi hech kimga sir emas. Darhaqiqat, kuchli bosim va tinimsiz e’tibor markazida bo‘lish oson emas. Bugun ana shunday bosimni yengib o‘ta olmagan yulduz futbolchilar haqida so‘z boradi.
Eden Azar – «Real Madrid»
Bu futbolchiniga bo‘lgan hurmatni saqlagan xolda ushbu ro‘yxatga kiritishga qaror qildik. To‘g‘ri, Azar Madridda o‘zining ilk mavsumini o‘tkazmoqda biroq, 30 yoshdan oshib ketgan futbolchining o‘yinida faqatgina pasayish kuzatilishi mumkin ekanligini bilish uchun futbol eksperti bo‘lish shart emas. Darhaqiqat, Eden jamoani tark etgan Ronalduning raqamini egalladi, lekin o‘rnini bosa olmadi. Katta ehtimol bilan bosa olmasa ham kerak. Belgiyalik futbolchidan muxlislar gollar kutgan bir paytda, u ortiqcha vazn muammosiga duch keldi. Bundan tashqari, unda o‘ziga bo‘lgan ishonch ham yetishmayapti. Madrid klubi Azarning yetakchilikni qo‘lga olishga qodir emasligini anglagach, Killian Mbappe transferi borasidagi ishlarni boshlab yuborishdan boshqa chora topa olmadi.
Ronaldino – «Milan»
Futbol afsungari «Barselona» muxlislari uchun barcha davrlarning eng yaxshi futbolchisi bo‘lsada, «Milan» tifozilarining fikri biroz o‘zgacharoq. Ronaldino Milan shaxri jamoasi sharafini 3 yil himoya qilganiga qaramay, klub muxlislarining ishonchini qozonishni uddalay olmadi. Yangilangan «Milan»ning yetakchisi bo‘lishi tahmin qilingan Roni Italiyada o‘zini umuman yo‘qotib qo‘ydi. 2002-yilda JCH g‘olibligini qo‘lga kiritgan va 2005-yilda «Oltin to‘p»ga loyiq ko‘rilgan Ronaldino 2008-yilda «Milan» safiga borib qo‘shiladi. «Milan» mutasaddilari uning trasnferidan katta daromad olishganini inobatga olmasa, Ronaldino klub uchun aytarli hech qanday karomat ko‘rsata olmadi.
Di Maria
2014-yilda «Manchester Yunayted» jamoasiga taklif qilingan argentinalik futbolchi klubning asosiy futbolchisi bo‘lishi tahmin qilingan edi, biroq barchasi o‘zgacha ko‘rinish oldi. «Real Madrid»dan 60 million yevro evaziga harid qilingan futbolchi Van Gal tomonidan klubning yangi yetakchisi bo‘lishi bashorat qilingan va muxlislarning Di Mariadan umidlari katta edi. YECHLning amaldagi chempioni sifatida Manchesterga tashrif buyurgan qahramonimiz nafaqat muxlislar, balki o‘zining ham hafsalasini pir qiladi. APLning jismoniy futboliga ko‘nika olmagan Di Maria uzoq vaqt o‘ziga o‘xshamay to‘p surdi. Uyiga og‘rilar hujum qilishgach esa, sokinroq Parijga yo‘l oldi va «Manchester Yunayted»ning uni sotib yuborishdan boshqa chorasi qolmadi.
Robinyo – «Manchester Siti»
21 yoshida zamonaviy futbolning eng kuchli tehnikaga ega o‘yinchisiga aylangan Robinyoning faoliyati yorqin lahzalarga boy o‘tgani hech kimga sir emas. Shunday bo‘lsada, qahramonimiz barcha klublarda ham o‘zini to‘liq namoyish etishning chorasini topa olmagan. Ana shunday klublardan biri sifatida «Manchester Siti»ni ko‘rsatishimiz mumkin. 2008-yilda Sheyxlar tomonidan taklif etilgan fantastik maosh va faoliyatini qayta ishga tushirish maqsadida «Manchester Siti» safiga kelib qo‘shilgan qahramonimiz jamoa yetakchisi bo‘lishi kutilgan edi. Jamoa uning atrofida qurilgan bo‘lsada, Robinyo yetakchilikni qo‘liga olishni uddalay olmadi. Tungi kublar va tartibsiz hayot tufayli o‘z sport formasini yo‘qotib qo‘ydi. Ko‘plab mutaxassislar tomonidan APLning eng yaxshi futbolchilaridan biri bo‘lishi kutilgan braziliyalik futbolchi atigi 2 mavsumdan so‘ng, klubdan ketishga majbur bo‘ldi.
