Fransiya chempionatining 14-turiga start berildi. «PSJ» o‘z maydonida «Lill»ni qabul qilib, ishonchli g‘alabani qo‘lga kiritdi.

Mezbonlar uchrashuvning 17-daqiqasida hisobni ochishdi. O‘ng qanotdan yetkazib bergan uzatmani Ikardi darvozaning bo‘sh qolgan qismiga joylab qo‘ydi. Oradan ko‘p o‘tmasdan Drakslerning uzatmasidan keyin Di Mariya darvozabon bilan yakkama-yakka vaziyatga chiqib ketdi va darvozani ishg‘ol qildi.

O‘yinning qolgan qismida har ikkala jamoada ko‘plab imkoniyatlar yuzaga keldi. "PSJ" futbolchilarining zarbalariga aniqlik yetishmagan bo‘lsa, Keylor Navas 2-3ta vaziyatda o‘z jamoasini qutqardi.

Neymar 40 kun ichida ilk marta parijliklar safida maydonga tushdi va 65-daqiqada uning o‘rniga shamollab qolgani aytilayotgan Kilian Mbappe tushirildi. Demak, har ikkala hujumchi 26 noyabr, seshanba kuni Yevropa chempionlar ligasi 5-turidan o‘rin olgan "Real"ga qarshi o‘yinga tayyor.

Ushbu g‘alabadan keyin "PSJ" o‘z ochkolarini 33taga yetkazib, ta’qibchilardan yanada ilgarilab ketdi.

Fransiya chempionati, 14-tur
PSJ – Lill 2:0 (2:0, 0:0)
Gollar: 1:0 – 17 Ikardi, 2:0 – 31 Di Mariya.
PSJ – Navas, Menye (Dagba, 65), Tiago Silva, Kimpembe, Bernat, Guye, Markinyos, Draksler, Di Mariya, Ikardi (Kavani, 78), Neymar (Mbappe, 65).
Lill – Menyan, Chelik, Tiagu Jalo, Fonte, Gabriel, Reynildu, Andre (Yazidji, 78), Sumare, Sheka (Sanshesh, 61), Ikone (Remi, 70), Luis Araujo.
Ogohlantirishlar: Kimpembe (20), Menye (30).