«Tottenxem» sardori Xarri Keyn bosh murabbiy Maurisio Pochettino iste’foga chiqarilganidan keyin uning uyiga tashrif buyurdi. Eslatib o‘tamiz, argentinalik mutaxassis 19 noyabr kuni vazifasidan ozod etildi.

Pochettino jamoa bilan shaxsan xayrlasha olmadi. Uning o‘rniga u taktika ko‘rsatmalar uchun mo‘ljallangan doskaga xayrlashuv so‘zini yozib ketdi. Keyn esa Pochettino bilan ko‘rishishga qaror qildi. Bu haqda Goal nashri xabar tarqatdi.

«Men uni ko‘rishni istadim. Yangi murabbiy kelgunga qadar bu ishni qilganim yaxshi bo‘ldi. Seshanba oqshomi biz uchun katta shok bo‘ldi. Keyin esa barchasi juda tez sodir bo‘ldi. Bizga yangi murabbiy keldi, futbol tarixidagi eng yaxshi mutaxassislardan biri. Biz boshimizni ko‘targan holda o‘yinga e’tiborimizni qaratishimiz kerak», — dedi Keyn.

47 yoshli Pochettino 2014 yildan beri «Tottenxem»ni boshqarib keldi. Uning qo‘lostida "shporlar" Yevropa chempionlar ligasi finaliga chiqishga muvaffaq bo‘ldi.