«Тоттенхэм» сардори Харри Кейн бош мураббий Маурисио Почеттино истеъфога чиқарилганидан кейин унинг уйига ташриф буюрди. Эслатиб ўтамиз, аргентиналик мутахассис 19 ноябрь куни вазифасидан озод этилди.

Почеттино жамоа билан шахсан хайрлаша олмади. Унинг ўрнига у тактика кўрсатмалар учун мўлжалланган доскага хайрлашув сўзини ёзиб кетди. Кейн эса Почеттино билан кўришишга қарор қилди. Бу ҳақда Goal нашри хабар тарқатди.

«Мен уни кўришни истадим. Янги мураббий келгунга қадар бу ишни қилганим яхши бўлди. Сешанба оқшоми биз учун катта шок бўлди. Кейин эса барчаси жуда тез содир бўлди. Бизга янги мураббий келди, футбол тарихидаги энг яхши мутахассислардан бири. Биз бошимизни кўтарган ҳолда ўйинга эътиборимизни қаратишимиз керак», — деди Кейн.

47 ёшли Почеттино 2014 йилдан бери «Тоттенхэм»ни бошқариб келди. Унинг қўлостида "шпорлар" Европа чемпионлар лигаси финалига чиқишга муваффақ бўлди.