Yevropa chempionlar ligasining "A" guruhidan o‘rin olgan "Real" - "PSJ" o‘yini boshlanmasidan oldin bu guruhdan  pley-off bosqichiga yo‘l olgan ikki jamoaning nomi aniq bo‘lib ulgurgan edi.

Turkiyaning «Galatasaroy» klubi o‘z maydonida Belgiyaning «Bryugge»sini qabul qilib, o‘yinga qo‘shib berilgan daqiqalarda g‘alabani qo‘ldan chiqardi. Natijada guruh bosqichi tugashiga 1ta tur qolganida bu ikki jamoa guruh favoritlariga yeta  olmaydigan darajada ortda qolib ketdi.

"Madrid" va "Pari-Sen Jermen" o‘rtasidagi o‘yin esa guruh peshqadamligi uchun kechdi. Zidan jamoasi bugun o‘zining eng yaxshi o‘yinlaridan birini namoyish qilib berdi. Bahsning 17-daqiqasida mezbonlar hisobni ochishdi. Karvaxalning uzatmasidan keyin Azar zarba berdi va to‘p ustunga tegib qaytdi. Benzema esa to‘pni darvozaga joylab qo‘ydi.

Uchrashuvning 43-daqiqasida juda qiziq voqea yuz berdi. "Real" darvozaboni Tibo Kurtua yakkama-yakka vaziyatga chiqqan Ikardini o‘z jarima maydonchasi ichida yiqitdi. Penalti va qizil kartochka! Ammo VAR vaziyatni qayta ko‘rib chiqqanidan keyin penalti va "qizil" bekor qilindi. Boisi, parijliklar penalti bilan yakunlangan hujumni boshlashdan oldin maydon markazida Marseloga nisbatan qoida buzishgan ekan.

Ikkinchi bo‘limda "Qirollik klubi" ustunlikni o‘z qo‘lida ushlab turdi va 79-daqiqada ikkinchi golni urishga muvaffaq bo‘ldi. Marseloning uzatmasidan keyin Benzema bosh bilan darvozani zabt etdi.

"Real" g‘alabani naqd qilgandek edi go‘yo, ammo qandaydir ikki daqiqa ichida "PSJ" oradagi farqni yo‘qqa chiqardi. Dastlab Varan va Kurtuaning tushunmovchiligidan Mbappe unumli foydalangan bo‘lsa, mehmonlar keyingi hujumni gol bilan yakunlashdi. Gol muallifi — Pablo Sarabiya.

Shu tariqa, "PSJ" o‘z ochkolarini 13taga yetkazib, guruh g‘olibligini naqd qildi, "qaymoqranglilar" 8 ochko bilan 2-o‘rinni naqd qilishdi.

Yevropa chempionlar ligasi, "A" guruhi. 5-tur
Galatasaroy Turkiya – Bryugge Belgiya 1:1 (1:0, 0:1)
Gollar: 1:0 – 11 Byuyuk, 1:1 – 90 Diatta.
Galatasaroy – Muslera, Mariano, Markao Teysheyra, Nagatomo, Bayram (Inan, 80), Lemina, Seri (Yardimji, 90), Feguli, Belxanda (Mor, 87), Byuyuk, Donk.
Bryugge – Minyole, Mexele, Rikka, Deli, Alvares, Bonaventure (Sxreyvers, 58), Vanaken, Diatta, Rits (de Ketelare, 46), Mata, Openda (Okereke, 77).
Ogohlantirishlar: Lemina (14), Rikka (28), Mata (31), Mariano (33), Diatta (66), Nagatomo (85), Mor (90), Muslera (90).
Chetlatishlar: Diatta (90+3), Mata (90+4).

Real Madrid Ispaniya – PSJ Fransiya 2:2 (1:0, 1:2)
Gollar: 1:0 – 17 Benzema, 2:0 – 79 Benzema, 2:1 – 81 Mbappe, 2:2 – 83 Sarabiya.
Real Madrid – Kurtua, Marselo, Varan, Ramos, Karvaxal, Isko (Rodrigo, 82), Kroos, Valverde (Modrich, 76), Kazemiro, Azar (Beyl, 69), Benzema.
PSJ – Navas, MenYE, Tiago Silva, Bernat, Markinyos, Verratti, Guye (Neymar, 46), Di Mariya (Draksler, 75), Kimpembe, Mbappe, Ikardi (Sarabiya, 75).
Ogohlantirishlar: Marselo (68), Menye (89).