Top-5 milliy chempionatlarda qiziqarli o‘yinlar bor. Aynan yorqin afishalar bir vaqtga to‘g‘ri kelib qolgan. Muxlis uchun tanlov imkoniyati keng. Boshqa tomondan bunday tanlov yoqimsiz ham. Axir barcha markaziy o‘yinlarni tomosha qilgimiz keladi.
Demak, parallel o‘tadigan o‘yinlar:
A Seriya ishqibozlari soat 22:45da boshlanajak "Inter" – "Jenoa" o‘yiniga ixtiyor berishlari mumkin. "Neradzurri" chempionlik uchun kurashyapti axir!
Germaniyada Yurgen Klinsmann boshchiligida o‘ziga kelayotgan va Yevroligalarga o‘rin uchun kurashga qo‘shilayotgan "Herta" peshqadamlardan biri "Borussiya" Myonhengladbax bilan kuch sinashadi. 1-davraning so‘nggi turi ko‘p narsaga oydinlik kiritsa ne ajab. O‘yin 22:30da boshlanadi.
Angliyada turning markaziy o‘yini bor. "Liverpul"dan keyingi jamoaga aylanib olgan, shiddatli futbol namoyish etayotgan "Lester Siti" bu turda "Manchester Siti"ning chempionlik kurashiga qaytish-qaytmasligini aniqlab beradi. Start 22:30da.
Yuqoridagilar-ku milliy chempionatlar tur o‘yinlari. Biroq bugun yana bir o‘yin borki, jahonning eng kuchli klubini aniqlab beradi. Klublar o‘rtasidagi JCH finali Lotin Amerikasi va Yevropaning azaliy qarama-qarshiligining yana bir saxifasidir. Ko‘hna qit’ada tengsiz bo‘lgan "Liverpul" Janubiy Amerikada birinchi raqamli jamoa bo‘la olgan "Flamengo" bilan chempionlik sovrini uchun kurashadilar. Ana shu supermatch ham 22:30 boshlanishi rejalangan.
Xo‘sh, Siz deyarli bir vaqtda boshlanajak o‘yinlarning qay birini to‘g‘ridan to‘g‘ri tomosha qilasiz?
Kamina Klublar o‘rtasidagi Jahon chempionati finalini sharhlayman. Va tabiiyki, ana shu o‘yinni tomosha qilishga tashviqot qilaman. Axir bu final!
Sport telekanalida 22:30da uchrashamiz, nasib bo‘lsa!
Liverpul (Angliya) – Flamengo (Braziliya)
SportTV. 22:30. LIVE!
