Yangi mavsumga jiddiy hozirlik ko‘rayotgan AGMK jamoasi navbatdagi transferni rasmiylashtirdi.
Jadallik bilan davom etayotgan seleksiya ishlari natijasida klubi navbatdagi transferga qo‘l urdi. Endilikda AGMK jamoasi sharafini Mate Vatsadze himoya qiladi.
O‘tgan mavsumning ikkinchi qismida Superligaga kelgan va ma’lum vaqt "Qizilqum"da o‘ynagan Vatsadze yangi mavsum uchun AGMK bilan shartnoma imzoladi.
Ma’lumot o‘rnida: Mate Vatsadze o‘z vaqtida Gruziya terma jamoasi to‘p tepgan, Yevropa ligasi musobaqasida o‘zini ko‘rsatgan va nufuzli Yevropa chempionlar ligasida o‘ynagan hujumchi hisoblanadi. Mate Yevropa ligasida jami 16 o‘yinda ishtirok etgan va 8ta golga mualliflik qilgan.
Hujumchi Gruziya terma jamoasi safida JCH-2014 hamda Yevro-2016 saralash bosqichi o‘yinlari hamda qator o‘rtoqlik bahslarida ishtirok etgan. Mate terma jamoa safida jami 16 o‘yin o‘tkazgan va raqiblar darvozasini 4 marotaba aniq nishonga olgan.
Mate futbolchilik faoliyatini Gruziyaning mashhur "Dinamo" Tbilisi jamoasida boshlagan va mazkur klub safida 108 o‘yin o‘tkazgan va 48ta gol urgan.
Shuningdek, Mate futbolchilik faoliyati davomida Daniya chempionatida 7 mavsum o‘tkazgan. Daniyaning nomdor "Orxus" klubida 2012-2016 yillar mobaynida o‘ynagan bo‘lsa, keyinchalik "Viborg" hamda "Silkeborg" jamoalari sharafini himoya qilgan.
Mate Vatsadze futbolchilik faoliyatida jami 328 uchrashuv o‘tkazgan va 117ta gol muallifiga aylangan.
AGMKning ahil oilasiga xush kelibsan, Mate!
Umid qilamizki, Mate Vatsadze yangi mavsumda AGMK jamoasi safida yorqin o‘yinlarni namoyish etib, ko‘plab gollar muallifiga aylanadi va jamoamiz tarixida o‘z nomini yozib qo‘yishga muvaffaq bo‘ladi.
Mate Vatsadze haqida qisqacha ma’lumot:
Tug‘ilgan sanasi: 1988 yil, 17 dekabr
Tug‘ilgan joyi: Gruziya
Yoshi: 31
Pozisiya: hujumchi
O‘ynagan jamoalari: "Dinamo" Tbilisi (2005-2010, 2018), "Volga" (Rossiya, 2011), "Dila" (2012), "Orxus" (Daniya, 2012-2016), "Lokomotiv" Tbilisi (2016), "Viborg" (Daniya, 2016-2017), "Silkeborg" (Daniya, 2018), "Liyepaya" (Latviya, 2019), "Qizilqum" (O‘zbekiston, 2019), AGMK (O‘zbekiston, 2020-...)
