«Yuventus» hujumchisi Krishtianu Ronaldu «Parma»ga qarshi bo‘lib o‘tgan o‘yin (2:1) borasida o‘z fikrlarini bildirib o‘tdi.

«Ushbu o‘yinda g‘alaba qozonish muhim ahamiyatga ega edi. «Inter» durang o‘ynagani va «Lasio» g‘alaba qozonganidan xabarimiz bor edi. Shuning uchun oradagi farqni oshirib olishimiz shart edi.

Qiyin bo‘ldi. «Parma» – yaxshi shakllangan jamoa. Uni mag‘lub etish qiyin, ammo biz bor kuchimiz bilan harakat qilib, g‘alabaga erishdik. Uch ochkoni qo‘lga kiritdik, muhimi shu», – dedi Ronaldu.

Ushbu g‘alabadan keyin «Yuventus» 51 ochko bilan A seriya jadvalida peshqadamlik qilmoqda. Ikkinchi o‘rindagi «Inter»da 47 ochko, uchinchi pog‘onadagi «Lasio» hisobida esa 45 ochko mavjud. Rimliklar bitta zaxira o‘yiniga ega.