BAA va O‘zbekiston U23 terma jamoalari o‘rtasidagi kecha bo‘lib o‘tgan uchrashuvdan so‘ng, OTJ a’zosi Dilshod Saidov bilan kichik intervmyu uyushtirdik.

— Dilshod, kechagi kombinasion o‘yin murabbiy ko‘rsatmasi edimi?

— Albatta, murabbiyning ko‘rsatmasi edi. Yigitlar bu o‘yinga nazariy jihatdan ham yaxshi tayyorgarlik ko‘rgan edi. Barchasi ish berdi. Arab jamoalariga qarshi musobaqadan oldin o‘tkazilgan o‘rtoqlik uchrashuvlarida to‘p surganimiz ham katta naf berdi deb o‘ylayman. Ularning o‘yin uslubi biznikiga yaqinroq. Shu sababli futbolchilar erkinroq harakat qilishdi.

— Vadim Abramov va Ro‘ziqul Berdiyevning tashrifi nima bilan bog‘liq?

— Birinchi navbatda ular bizga ruhiy ko‘mak berish uchun kelishdi. O‘yin oldidan kirib biz bilan biroz suhbatlashishdi. Hech qanday taktik yoni strategik ko‘rsatmalar bo‘lgani yo‘q. Shunchaki, do‘stona tashrif va ruhiy dalda. Ochig‘i, ular bilan suhbatlashib o‘zimizni xuddi O‘zbekistondagi o‘yinga tayyorgarlik ko‘rgandek his etdik.

— Saudiya Arabistoni bilan o‘yinda ikkinchi raqamda harakat qilasizlarmi yoki birinchi?

— Endi qaysi jamoa kuchli o‘yin ko‘rsatsa, o‘sha jamoa finalga yo‘l oladi. Bu juda va juda muhim  jihat. Shuning uchun musobaqadagi qolgan barcha uchrashuvlarda hujumkor futbol o‘ynashga harakat qilamiz. Asosiysi, jamoaviy hujum va tartibli himoya. Nasib qilsa, yurtimizga yorug‘ yuz bilan qaytishni niyat qilganmiz.