Tailand yashil maydonlarida 23 yoshgacha bo‘lgan futbolchilar o‘rtasida Osiyo chempionati uchrashuvlari davom etmoqda.

Endilikda turnirda qolgan 4 ta yurt jamoasi bosh sovrin hamda Olimpiadada qatnashish imkonini beradigan 3 ta yo‘llanma uchun kurashni davom ettirmoqda.

Yarim finalda O‘zbekiston olimpiya terma jamoasi Saudiya Arabistoni bilan bahs yuritadi. Uchrashuvni O‘zbekiston terma jamoasi ko‘k rangli libosda o‘tkazadi. Darvozabonimiz eginida sariq rangli sport formasi bo‘ladi.

Raqib esa yashil libosda maydonga chiqadi. Saudiyaliklar posboni qora rangdagi forma kiyadi.

Uchrashuv ertaga Bangkokdagi "Rajamangala" stadionida bo‘lib o‘tadi va soat 15:15da start oladi.