"Tottenxem" – "Manchester Siti". Markaziy o‘yin. Bu afisha ortida ikki familiya turganini hamma tushunib turibdi. Aynan shu familiyalar top-oltilikdagi ikki jamoa o‘rtasidagi e’tiborli bahsni prinsipial super qarama-qarshilikka aylantirmoqda. Mourinyo – Gvardiola.

Ularning “munosabatlari” boshlanishi 2009 yilga taqaladi. O‘shanda Chempionlar ligasi guruhida Pepning g‘alabalar mashinasiga aylangan "Barselona"si birinchi bor Jozening yo‘lto‘sarlari armiyasiga duch kelgan va yutolmagan, "Inter" – "Barselona" - 0:0. Uyog‘i shouga aylanib ketgan. Jahon futbolida gegemonlik o‘rnatib bo‘lgan Pep uchun Mour tuflisiga kirib qolgan toshdek erkin yurish imkonini bermasdi.

"Inter" o‘sha yili sensasion ravishda "Barsa"ni mag‘lub etib Chempionlar ligasida g‘olib chiqqan. "Portu"da bu ishini qilganda ko‘pchilik tasodif deb bilgan bo‘lsa, "Internasionale" voqeasidan so‘ng Mourinyo o‘sha paytning eng zo‘r 3 murabbiyidan biri darajasiga yetdi. Yana biri Gvardiola edi.

Uyog‘iga "Real Madrid" va "Barselona"dagi duellar, janjallar, ishkallar. Taxta bozordagi karnay-surnaylar sababchilari ham aslida shu murabbiylar bo‘ladi. Qaysidir ma’noda aynan mana shu juftlik o‘rtasidagi keskinlik sabab Manchester shahrining ikki jamoasi ularni bir vaqtda ishlatib ko‘rgan bo‘lishi ham mumkin. APL piar mashinasining katta yutug‘i edi bu ham. Biroq Mourning o‘zi uchun ham, "MYU" uchun ham bu pasayishga davriga to‘g‘ri kelgani uchun birinchi urinishda o‘xshamadi.

Bugun ikkinchi urinish bo‘ladi. Angliyada. Mourinyo – Gvardiola to‘qnashuvi. Birgalikda shu bahsni tomosha qilishga taklif etaman!

Davron Fayziyev.