Kechagi Pep va Maur to‘qnashuvini ko‘rib, odam o‘zgarmas ekan, deb qo‘ydim. Gvardiola haligacha o‘z taktik qarashlari bilan yengmoqchi bo‘ladi portugalni, Joze esa, raqibining asabiga o‘ynab yengishga urinadi. Gohida u, gohida bu murabbiy g‘alaba qozonsa-da, muhimi, ikkisi hech qachon o‘zgarmaydi.

“Tottenhem” kecha “Siti”ning planlarini izdan chiqardi. To‘g‘ri, bunga penaltidan foydalana olmagan Ilkay ham yordam berib yubordi, ammo shu vaziyatlardan so‘ng “shaharliklar” baribir asabiylashishlari aniq edi. Shuni kutdi Maur va...

“Siti” bir o‘yinchi kam bo‘lib qolgandan keyingi hujumlari va gollarini ko‘rib turib, yaqin o‘tmishga sayr etmasdan ilojimiz yo‘q:

“Inter”ning “Barsa”ni YECHL finaliga qo‘yib yubormayotgan o‘yini...

“Real”ning ishkallar ostida o‘tgan bahsda kataloniyaliklarni dog‘da qoldira olgani (U “Barsa”ni yengish mumkin emasdi go‘yo)...

 “Chelsi” “ManSiti”ni qiynayotgan lahzasi...

va Manchester derbisidagi taloto‘p kurashlar yodimizga tushadi.

Liboslar o‘zgaraveradi, jamoalar o‘zgaraveradi, ammo bu murabbiy qo‘l ostidagi yigitlar xarakteri, uslubi saqlanib qolarkan.

Davron Fayziyev sharh davomida to‘g‘ri aytdi: Bu yigitlar bir-biri bilan boshqa payt yaxshi munosabatda bo‘lishlari mumkin, ammo shu o‘yinda o‘zlari bilmagan holda Pep va Maurga aylanib qolishdi.

Messi va Ronaldu to‘qnashuvi deyarli tugab bo‘ldi, ammo bu ikki telba murabbiy kurashi davom etmoqda. “Liverpul” chempion bo‘lish arafasida, biroq bu ikkisi yana barchani o‘zlariga qarata olishdi. Metrlar, maestrolar...

Xayrulla HAMIDOV