Nelson Mandelani bilmagan odam bo‘lmasa kerak. Afrika xalqlari ozodligi uchun kurashgan, buning natijasida 27 yil ozodlikdan mahrum etilgan. 27 yil, a!!!

20-asrning metin qahramonlaridan biri og‘ir paytlari ham xalqi uchun yashayvergan. Kurashdan to‘xtamagan. Uning jallodlari Nelsondan oldin o‘tib ketishdi dunyodan. U esa, barchasiga sabr qilib, o‘z qarashlarida mustahkam turdi.
 
1990 yili ozodlikka chiqarilgach, uning hayoti endi qanday davom etganini yaxshi bilasiz.  Nelsonni bu sabru matonatlari uchun Nobel mukofoti va Janubiy Afrika Respublikasi Prezidenti lavozimi kutib turardi. Shuningdek, 1918 yili tug‘ilgan siyosatchi uzoq yashadi – 2013 yili vafot etdi. 95 yillik umr. Go‘yo uning 27 yillik qamoq hayoti vaqt e’tibori bilan to‘xtab turganu, ozodlikda shu yillar qo‘shib berilgandek. Ozorlaru sabri uchun mukofot hech kimni ajablantirmagan, albatta.

“Liverpul” ham o‘ttiz yil bo‘ldi Angliya chempioni bo‘lmaganiga. Shuncha yillik jabru omadsizliklari uchun unga mukofotlar qo‘shqo‘llab berilayotganiga jamoa xeyterlarining jahli chiqmasin. Klub nimaiki sovrinlar bo‘lsa olishga arziydi. Bu yil.

Kerakmas deb hisoblagan turniriga akademiyasini yuboryapti va ular asosiy tarkib yenga olmagan klubni mag‘lub etib qo‘ymoqda. Chelsi bilan ham shu tarkib o‘ynasa, londonliklar yutqazib qo‘yishsa, ajablanmayman. Nobel mukofotini ham bu yilcha istisno qilib, Klopp yigitlariga topshirib turing, janoblar! Arziydi.

Xayrulla HAMIDOV