Yoshligimizda buvilarimiz aytishardi: janjalning ovozini mahalla eshitmasin. Agar bir marta eshitib qolsa, keyin quloq solaveradi. Ovoz ko‘tarib gapirsang ham janjalga yo‘yishadi, deb. Barselonadan chiqayotgan "ovozlar" endi janjal hisobiga o‘tyapti. Aslida bunaqa gap-so‘zlar ayni paytda ko‘pgina klublar bazasida yangrayotgan bo‘lishi mumkin. “Mahalla” bilmaydi, xolos.

Xo‘p, Kataloniya klubining muammolari rostan ham jiddiymi? Menimcha, u qadar emas. Chunki istalgan muammoni (agar u chindan ham mavjud bo‘lsa) yaxshi natija bilan berkitsa bo‘ladi. Qatorasiga g‘alabalar barchaning ovozini o‘chiradi. Hech kim hech narsa deyolmaydi.

Rahbariyatning darg‘azab bo‘lgani ham, davomidan Messining instagramda qoldirgan izohi ham ko‘p ehtimol oxirgi natijalarga bog‘liq. “Barsa” ayni paytda barqaror o‘yin ko‘rsatayotgan bo‘lsa-da, natijalarida silkinish bor. Superkubokdagi mag‘lubiyat, Setyen kelgach-da “Valensiya”ga boy berilgan o‘yin va asosiy raqibining peshqadamga aylanib olgani “Barsa” a’zolariga har tomonlama ta’sirini o‘tkazmoqda.

O‘yin uslubi va tiki-taka haqidagi gaplar esa, yaxshi natija qayd etilib tursa, ishoning, umuman gapirilmaydi va eslanmaydi. Jamoa yutqazishni boshladimi, demak, nimadir ishdan chiqqan, degan xulosalar qadimdan bor. Kataloniya tomonda muammoning bosh sababi – natijalar. Bo‘ldi.

Endi “achchiqni achchiq kesadi” deganlaridek, bugungi muammolar girdobiga kirib qolgandek tuyulayotgan jamoani Setyenning allambalo uslublari yo yangi futbolchini jamoaga olib kelish qutqarmaydi. Faqat natija. Natijaning yomonlashuvi shuncha muammolarni yuzaga olib chiqdimi, yaxshi natija o‘sha muammolarni suvning ichiga tiqib yuboradi yana.

Shunday ekan, bugungi bahs “Barselona” uchun juda zarur. Uyida istalgan raqibga syurpriz ulashuvchi Bilbaoning “Atletik”i Messi va uning do‘stlari haqida gapirilayotgan serialga yo yakun yasaydi – yutqazib, yo davom ettirib yuboradi – yengib.

Uchrashuvni shu e’tibor bilan kuzatishimiz kerak. Har xil uslublar, raqamlar odatda muammolarni yopish uchun ishlatilsa, ba’zan o‘yinning asl maqsadidan ham chalg‘itadi.

O‘yin tunda, soat 01:00da. Ikki “Real” ishtirokidagi uchrashuvdan so‘ng kuzatish yanada zavqli.

Xayrulla HAMIDOV.