«Manchester Siti» hujumchisi Serxio Aguero Angliya premyer-ligasining yanvar oyidagi eng yaxshi futbolchisi deb topildi. 31 yoshli futbolchi o‘tgan oyda 3ta o‘yinda maydonga tushib, 6ta gol urishga muvaffaq bo‘ldi.

Argentinalik futbolchi uchun ushbu sovrin faoliyatidagi yettinchisi bo‘ldi. Ushbu ko‘rsatkich bo‘yicha Aguero «Liverpul» afsonasi Stiven Jerrard va «Tottenxem» forvardi Xarri Keynni ortda qoldirgan holda birinchi o‘ringa ko‘tarilib oldi.

E’tiborli tomoni, Serxio sovrinlarining 3tasini yanvar oyining eng yaxshi futbolchisi sifatida qo‘lga kiritdi.

Aguero quyidagi oylarda APLning eng yaxshi futbolchisi deb topilgan:

2013 yil oktyabr
2014 yil noyabr
2016 yil yanvar
2016 yil aprel
2018 yil yanvar
2019 yil fevral
2020 yil yanvar