Ispaniya La ligasining 24-turi doirasida «Barselona» o‘z maydonida jadvalda 3-pog‘onani egallab turgan «Xetafe»ni qabul qilib, qiyin g‘alabaga erishdi.

Mehmonlar uchrashuvni yuqori pressing bilan boshlab, raqibning vaziyat yaratishiga imkon bermadi. Aksincha, madridliklar 23-daqiqada hisobni ochishgan edi. Burchak zarbasidan keyin Molina bosh bilan zarba berdi, ter Shtegen qaytardi. Qaytgan to‘pni Allan Nyom darvozaga joyladi!  Ammo VAR ko‘rsatdiki,  Nyom to‘pga ega chiqishdan oldin o‘zini ta’qib qilayotgan Umtitiga qonunga xilof ravishda yiqitgan ekan. Shu bois, gol bekor qilindi.

33-daqiqada esa mezbonlar hisobni ochishdi. Messining ajoyib uzatmasidan keyin Grizmann darvozabon bilan yakkama-yakka vaziyatga chiqib ketdi va darvozani zabt etdi. Oradan 6 daqiqa o‘tib kataloniyaliklar ikkinchi golni ham urishdi. "Barselona" o‘ziga xos qisqa paslar bilan hujum tashkil qildi. Firpo qanotdan yetkazgan uzatmani Serji Roberto darvozaga joylab qo‘ydi.

Ikkinchi bo‘limni Setyen shogirdlari sokinlik bilan olib borishayotgan edi. Ammo 66-daqiqada "Xetafe" hisobni qisqartiruvchi golni urdi. O‘ng qanotdan yetkazilgan to‘pni tushirmasdan Anxel Rodriges 14 metrdan darvozaga joylab qo‘ydi.

O‘yinga intriga qaytganidan keyin qolgan daqiqalar ancha qiziqarli kechdi. Jumladan, "Xetafe" "standartdan hisobni qisqartirishga yaqin keldi, ammo ter Shtegen jamoasini qutqardi. Antuan Grizmann esa ikkita qulay vaziyatni ko‘kka sovurdi.

Shunga qaramay, "Barsa" g‘alabani saqlab qoldi, ochkolari bo‘yicha "Real"ga yetib oldi.

Ispaniya La ligasi, 24-tur
Barselona – Xetafe 2:1 (2:0, 0:1)
Gollar: 1:0 – 33 Grizmann, 2:0 – 39 Serji Roberto, 2:1 – 66 Anxel Rodriges.
Barselona – ter Stegen, Serji Roberto, Umtiti, Pike, Alba (Firpo, 22), Buskets, Artur (Rakitich, 75), de Yong, Fati (Vidal, 85), Grizmann, Messi.
Xetafe – Soriya, Echeyta, Djene, Nyom, Kukurelya, Maksimovich, Arambarri, Etebo (Ndiaye, 67), Olivera (Kenedi, 52), Mata, Molina (Anxel Rodriges, 52).
Ogohlantirishlar: Umtiti (49), Mata (73), Firpo (82), Fati (85), Kenedi (89).