Man Siti Chempionlar ligasidan chetda qolayotgani APLdagi raqobatni yanada oshirib yubordi. Endi 6 jamoa ishtirokidagi kurash shunday bosqichga chiqqanki, bu kurash kuchli beshlikning istalgan boshqa chempionatidagi chempionlik uchun kurashdan ham qiziqroqdek.

Bugun London ikkiga bo‘linadi. Bugun Mourinyo tumanli Albiondagi o‘zi uchun eng qadrdon stadionga keladi. Kuchli to‘rtlik uchun jiddiy kurash olib borayotgan va bir-biridan faqatgina 1 ochko ajratib turgan jamoalar o‘zaro hisob-kitob qilishadi.

Birinchi davrada Mourinyo o‘zining sobiq shogirdiga imkoniyatni boy bergandi. Villian dublini rasmiylashtirgan, Son qizil olgan uchrashuvni eslasangiz kerak. Endi portugaliyalik mutaxassis Lemparddan o‘ch olishga urinib ko‘radi.

Har ikki klub bir xilda — 43 tadan gol urgan. Chelsi faqatgina 2 ta ko‘proq gol o‘tkazib yuborgan. Aristokratlarga bugun Kante va Pulishich yordam bera olmaydi. Shporlar safidagi yo‘qotishlar yanada jiddiyroq — jamoaning ikki asosiy yetakchisi — Keyn hamda Son maydonga tusha olishmaydi.

Biroq bu shunday o‘yinki, yuqoridagi fikrlar umuman muhim emas. Uchrashuv boshlangach hamma statistika unutiladi, uchrashuv emas, haqiqiy jang bo‘ladi. Jamoalar nafaqat o‘zlari va raqiblari haqida, balki shundoqqina ortlarida nafas olib turgan Sheffild, Yunayted, Vulver, Everton-u Arsenal haqida ham o‘ylashlari kerak. Bugun shu uchrashuvni birgalikda ko‘ramiz. Bu o‘yinni ko‘rmaslik xato bo‘lardi.