Toshkentning "Paxtakor" klubi Moskvada "Spartak" bilan o‘rtoqlik uchrashuvi o‘tkazdi "Sherlar" mazkur o‘yinda yirik 4:0 hisobida mag‘lub bo‘ldi. O‘yindan so‘ng "Paxtakor" bosh murabbiyi Shota Arveladze jurnalistlarning savollarpiga javob berib o‘tdi.

- Rasmiy o‘yinlardan yana o‘rtoqlik uchrashuviga qaytganimiz xalal bergani yo‘q. Raqib kuchli jamoa "Spartak" edi. O‘zimizni tekshirib olishga yaxshi chorlov. Ishlashimiz kerak bo‘lgan jihatlarni o‘zimiz uchun ko‘rib, belgilab olamiz. Saviya, tezlik, yakkakurashlar borasida muammo borligi ko‘rindi. Jismoniy tarafdan imkoniyatlarimizni o‘stirishimiz kerak. Menimcha, shunday kuchli jamoalar bilan ko‘proq o‘ynab, yuqori sur’atdagi o‘yinlarga moslashishimiz kerak.

Oldinda bizni chempionat va Chempionlar ligasi kutmoqda. Osiyoda ham kuchli jamoalar ko‘p, xalqaro o‘yinlar yuqori sur’atda o‘tadi. Tezlik va jismoniy jihatni o‘stirishimiz lozim.

"Spartak" stadionida sharoitlar ajoyib, maydon a’lo holatda. Ularga o‘yin uchun minnatdorchilik bildiraman.