2020 yilgi futbol mavsumi AGMK uchun azaliy raqib sanalgan Bekobodning "Metallurg" jamoasiga qarshi o‘yin orqali boshlanadi. Superliganing ilk turida "Metallurg" Olmaliqda AGMK mehmoniga aylanadi.

Bu to‘qnashuv jamoalarning chempionat doirasidagi o‘zaro 25-bellashuvi bo‘ladi. Toshkent viloyati derbisida AGMK va "Metallurg" chempionat doirasida 24 marotaba to‘qnash kelgan. O‘tkazilgan uchrashuvlarda 11 g‘alaba AGMK hisobiga, 11 yutuq "Metallurg" nomiga yozilgan. Qolgan 2 bellashuvda esa g‘olib nomi aniqlanmagan. To‘plar nisbati 46-45, AGMK foydasiga.

Shuningdek, Toshkent viloyati vakillari O‘zbekiston Kubogida ham o‘zaro duch kelishgan va unda ustunlik bekobodliklar tarafida - 2 g‘alaba.

Liga Kubogi musobaqasida ham o‘zaro to‘qnash kelgan mazkur jamoalarning ko‘rsatkichida AGMKda ustunlik mavjud. O‘tgan yili o‘tkazilgan musobaqaning guruh bosqichida tomonlar murosa ko‘chasini tanlashgan bo‘lsa, chorak finalda Zafar Polvonovning goli jamoamizga g‘alaba keltirgandi.

Umumiy hisob-kitobga ko‘ra, AGMK va "Metallurg" barcha musobaqalarda jami 28 marotaba to‘qnash kelgan va unda AGMK 12 g‘alaba, "Metallurg" 13 g‘alaba va qolgan 3 bellashuvda durang natijasi qayd etilgan.

Superliganing 1-turi doirasidagi AGMKning ehtimoliy g‘alabasi jamoamizga ushbu qarama-qarshilikning chempionat tarixidagi ko‘rsatkichini yaxshilaydi va g‘alabalar soni bo‘yicha "Metallurg"dan uzib ketish imkoniyatini beradi. Shuningdek, ehtimoliy g‘alaba barcha musobaqalardagi umumiy ko‘rsatkich bo‘yicha hisob-kitobni tenglashtiradi.