"Liverpul" klubining superseriyasi kelib-kelib "Uotford"ga qarshi uchrashuvda uzildi. "Buyuk "Arsenal"ni esa, Manchesterning qizil tomoni to‘xtatgandi. Farqni ko‘ryapsizmi?

"Arsenal"ni o‘sha paytda yagona ta’qibchisi to‘xtatgan va bu Venger yigitlarining mutlaq barqarorligini, kuchliligini ko‘rsatadi. "Klopp bandasi" "Etihad"gacha yetib bormadi va yirik hisobda yengildi.

Taqvimda 29 fevral to‘rt yilda bir keladiyu, shunisi mersisaydliklarga to‘g‘ri kelib qoldi, nachora.

Haqiqiy "liverpulcha" uslub bu ham — baribir qonida "robingud"ligi bor-da, yetakchilarga emas, ochko o‘ta zarur zaiflarga ulashdi uch ochkosini.

Endi boshqa savol tug‘iladi:

 "Liverpul" kayfiyat jamoasi bo‘lgan oldin, bir o‘yinda yengilsa, o‘ziga kelib olishi o‘ta mushkul bo‘lgan. Shu narsa ham qonida qolib ketganmikan?

Yana bir o‘rtamiyona — "Bornmut"ga qarshi ham shunday o‘yin ko‘rsatarmikan? "Atletiko" kutib turibdi hali...

Qiziq kuzatuv.

Klopp uchun aslida mag‘lubiyatsiz mavsumdan ko‘ra shunisi yaxshi edi. Birinchidan, chempion bo‘ladi baribir. Ikkinchidan, jamoaning DNKsida qolib ketgan bir-ikki negativlarni shu yilning o‘zidayoq yo‘qotib, keyingi yil uchun balans hosil qilib oladi.

Shundagina o‘ttiz yildan oldingi barqaror "Liverpul"ni qurib olish mumkin. Hozir yoqmayotgandir, lekin keyinchalikka aynan shu mag‘lubiyat foydalidek tuyulyapti.

"Liverpul" klubini mana shunday darajaga — ilk mag‘lubiyati bayram qilinadigan darajaga chiqqani bilan tabriklayman. Bunaqa klublar tarixda kam bo‘lgan.

Xayrulla HAMIDOV.