"Ливерпуль" клубининг суперсерияси келиб-келиб "Уотфорд"га қарши учрашувда узилди. "Буюк "Арсенал"ни эса, Манчестернинг қизил томони тўхтатганди. Фарқни кўряпсизми?

"Арсенал"ни ўша пайтда ягона таъқибчиси тўхтатган ва бу Венгер йигитларининг мутлақ барқарорлигини, кучлилигини кўрсатади. "Клопп бандаси" "Этиҳад"гача етиб бормади ва йирик ҳисобда енгилди.

Тақвимда 29 февраль тўрт йилда бир келадию, шуниси мерсисайдликларга тўғри келиб қолди, начора.

Ҳақиқий "ливерпулча" услуб бу ҳам — барибир қонида "робингуд"лиги бор-да, етакчиларга эмас, очко ўта зарур заифларга улашди уч очкосини.

Энди бошқа савол туғилади:

 "Ливерпуль" кайфият жамоаси бўлган олдин, бир ўйинда енгилса, ўзига келиб олиши ўта мушкул бўлган. Шу нарса ҳам қонида қолиб кетганмикан?

Яна бир ўртамиёна — "Борнмут"га қарши ҳам шундай ўйин кўрсатармикан? "Атлетико" кутиб турибди ҳали...

Қизиқ кузатув.

Клопп учун аслида мағлубиятсиз мавсумдан кўра шуниси яхши эди. Биринчидан, чемпион бўлади барибир. Иккинчидан, жамоанинг ДНКсида қолиб кетган бир-икки негативларни шу йилнинг ўзидаёқ йўқотиб, кейинги йил учун баланс ҳосил қилиб олади.

Шундагина ўттиз йилдан олдинги барқарор "Ливерпуль"ни қуриб олиш мумкин. Ҳозир ёқмаётгандир, лекин кейинчаликка айнан шу мағлубият фойдалидек туюляпти.

"Ливерпуль" клубини мана шундай даражага — илк мағлубияти байрам қилинадиган даражага чиққани билан табриклайман. Бунақа клублар тарихда кам бўлган.

Хайрулла ҲАМИДОВ.