O‘tgan hafta hisoboti yoki shu payt bir gaplashgim keldi degan post.

Ko‘p bor chiqishlarimda aytib o‘taman, ish faoliyatimdagi yo‘nalishlar orasida sharhlovchilik boshqacha o‘rin tutadi. Bu mening doimiy tanlovim bo‘lgan. Har qanaqa salmoqliroq va foydaliroq variantlar oldida sharhni ustun qo‘yganman.

Ma’lum muddat sharhdan uzilsam sog‘inaman. Fevral o‘rtasida xizmat safari sabab bir haftagina efirdan uzoq bo‘ldim. Qaytishim bilan FUTBOL-TV efiriga sho‘ng‘idim. O‘tgan haftada 4 ta o‘yin va 3 ta studiyada ishladim. Ya’ni to‘liq hafta. Bularning hammasi kechasi soat 1 lar atrofida boshlandi. O‘yinlar tugashi esa bilasiz tonggacha boradi deyarli. Kunduzi O‘FAda ham ish qiziydi. Orada biroz kuch va energiyani tiklab olishga imkon topamiz. Ijod tundan tungacha, turdan turgacha davom etaveradi. Shunday bo‘lsada, efirsiz normal rejimga qaraganda, sharhlardan iborat o‘yqusiz tunlar menga afzalroq.

Tomoshabinlardan har xil feedback munosabat olamiz. Ijobiylariga shukur qilaman, salbiy ham bor albatta. O‘ylaymanki, salbiyni inobatga olib bartaraf etishga urinishimni siz sezasiz. O‘rinli tanqid e’tiborsiz qolmaydi.

Darvoqe, bu post orqali telegram kanalimda ham aktivligim o‘rtacha darajada ekanligiga izoh berib ketgandekman. Lekin, bu yerda aktivlashaman. Bu aniq rejada bor. Telegram auditoriya menga yoqdi. Aktiv!

Shu kanalimga va umuman olganda ijodimga sal bo‘lsa ham e’tibor qaratgan barchangizga rahmat. Har biringiz men uchun huddi qadrdondeksiz. Boringizga shukur!

Davron Fayziyev.