Bolaligimizda maktabda qiziq bir odat bor edi. Sinfda eng zo‘ravonlar Birinchi paxan, ikkinchi paxan, uchinchi paxan... deb atalar va odatda kuchli beshlik birga yurardi. Birinchi ikkinchidan, ikkinchi uchinchidan kuchli bo‘lgani uchun - qachondir o‘zaro mushtlashuvda yutgani uchun shunaqa ketma-ketlik yuzaga kelgandi.

Albatta, qolganlar beshinchi, oltinchi..., o‘ninchi va h.k. Chamasi 5-sinfda shakllangan bu iyerarxiya 9-sinfda tasodifan o‘zgardi. 5 yil davomida Ikkinchi bo‘lib kelgan bola Birinchi bilan urushib qoldi. Va... uni yengdi. Sinfdagi qolganlar hayron. Birinchi degan nomni yangi Qirolga berish kerak. Beray desa, hozirgina Birinchi bo‘lib turgan endigi Ikkinchidan qo‘rqishadi, bermay desa endi Birinchi bo‘lib olgan Ikkinchidan. U bo‘ldi, bu bo‘ldi, iyerarxiya o‘zgardi.

Gap kim nechanchiligida emas, balki shu maqomga rozi bo‘lib yashalganida. 5 yil hech kim ortig‘iga da’vo qilmagan turg‘unlik yillarida. Birinchidan kaltak yeyish va so‘kish eshitishga ko‘nikkan boshqalarda. Va bir kuni buni o‘zgartirgan tasodifda.

Bugun oqshom ham uzoq davom etib kelgan an’ana o‘zgararmikin, nima deb o‘ylaysiz? Myonhengladbax 2014 yildan beri Dortmundni yenga olmaydi. Oxirgi 10 o‘yin ham Dortmund foydasiga. Nima qilmoq kerak? Balki aynan bu kun ularning burnini qonatish imkoniyatidir? Tasodif yordam berarmikin yo yashillar o‘z kuchi bilan yengarmikanlar?

Bundesliganing ayni damdagi Uchinchisi "Borussiya" Dortmund va To‘rtinchisi "Borussiya" Myonhengladbah, yo‘qotilgan ochkolar bo‘yicha esa teskarisi: Gladbah Uchinchi, Dortmund esa To‘rtinchi. E, ularning nechanchi ekanligi ham ahamiyatsiz - ahamiyatlisi, ular chempionlik kurashidalar.

Marko Roze ajoyib straykeri Markus Tyuramning yo‘qligini o‘tgan turda Lars Shtindl bilan yechdi. Qolaversa, Patrik Hermann va Bril Embolo ham bor. Alassan Plea bobida muammo yo‘q.

Lyusyen Favrning qo‘l ostidagi yulduzlar esa o‘yini o‘xshab qolsa, bundesosmonni yarqiratib yuborishadi: Torgan Azar, Jeydon Sancho, Erling Holann, Yulian Vaygl, Rafa Gerreru, Emre Jan, Ashraf Hakimiy, Marko Roys, Mario Gyotse, Aksel Vitsel...

Xo‘sh, doim kaltak yeb yurgan bola o‘zidan kuchliroq bo‘lib kelgan o‘zaro to‘qnashuvlardagi "Birinchi paxan"ni yenga olarmikan?

22:25 da SportTVda jonli translyasiyani tomosha qilaqoling. Bundesliga va Yevrohaftadagi markaziy o‘yinlardan biri, ehtimol, eng yorqin afisha.

Uchrashamiz!

Bobur Akmalov