​​Qiziq fakt, «Manchester Siti»ning bugungi tarkibi umumiy 1.16 milliard funtga baholanyapti ekan. «Manchester Yunayted» esa, aynan shu transfermarket ma’lumoti bo‘yicha, 720 million.

Gvardiola kelgan paytda, «Siti»ning futbolchilari 593 million, «Yunayted» esa, 509 million bo‘lgan ekan. Endi transferlarga qarasak, bu davrda «shaharliklar» 787 million, «iblislar» esa, 598 million sarflashibdi.

Qarang, «Manchester Siti» ikki barobar oshibdi, «Yunayted» esa, bir yarim barobar. Transferlar uchun sarflangan pullar u qadar katta farq emas. Demak, «Siti»ning transfer harajatlari rejali va hatto moliyaviy tomondan ham foydali bo‘lganini ko‘rishimiz mumkin.

Ko‘pincha, «MYU» biznes loyihaga aylanib ketgani haqida ko‘p gapirishadi, ammo ko‘ryapmizki, maydondagi muvaffaqiyatlarsiz katta pullar ko‘kka sovurilishi ham mumkin ekan.

Kuni kecha, Skott Maktominining qiymati so‘nggi ikki yilda 28 barobar oshganini o‘qib qoldim. Balkim, Sulsher bilan yangi rivojlanish yo‘liga tushib olgani aytilayotgan «Manchester Yunayted» ham endi tom ma’noda qo‘shnilariga raqobatchi bo‘lar?

Bugun bu ikki jamoa «Old Trafford»da kuch sinashishadi. O‘ziga yarasha qiziq duel.

E’tiborli tomoni, Manchester derbilarida, so‘nggi besh yilda g‘alati tendensiya kuzatilmoqda - asosan mehmonlarning g‘alabasi bilan yakunlanyapti. Shu davrda «Etihad»da 4 marta g‘alaba qozongan «MYU» o‘z maydonida atigi bir marta yutdi va 4 o‘yinni yutqazdi.

Yana bir ma’lumot, agar bugun Sulsher g‘alaba qozonsa, Pep Gvardiola ustidan uchinchi g‘alabasiga erishadi va bu borada, Arsen Venger va Maurisio Pochettinoga yetib oladi. Faqat ikki murabbiy - Yurgen Klopp (9ta) va Joze Mourinyolar (6) ko‘proq Gvardiolani yutganlar xolos.

Qahramon Aslanov