Ushbu ruknimizdagi eng so‘nggi yangiliklar bilan tanishtirishda davom etamiz.
“Ayaks” yulduzi Londonga ketadimi?
“Gollandiyaning “Ayaks” jamoasi yarim himoyachisi David Neres APLga ko‘chib o‘tishi mumkin”, - deya xabar bermoqda TMW nashri.
Manba bergan xabarlaga qaraganda, 23 yoshli vingerning hizmatlari bilan “Chelsi” va “Tottenhem” klublari jiddiy qiziqib qolgan. Gollandlar o‘z futbolchisi yetarlicha o‘yin amaliyotiga ega bo‘lmasada, uni 50 million yevrodan kamiga sotmoqchi emas.
Eslatib o‘tamiz, braziliyalik futbolchining xizmatlari bilan PSJ va “Yuventus” jamoalari ham qiziqib qolgan.
Nemis “Liverpul”ga o‘tmaydi
Germaniyaning “Bayer” klubi yarim himoyachisi Kay Xaverts “Liverpul” jamoasining taklifini rad etishga tayyor. Gap shundaki, 20 yoshli futbolchi Myunxenning “Bavariya” jamoasiga o‘tishni istamoqda. Futbolchi Bundesliga chempioni bo‘lish va YECHLda zafar quchish uchun “Bavariya”dan yaxshiroq klub yo‘qligini rasman e’lon qildi.
Avvalroq futbolchining agenti Kay “Bavariya” o‘yin amaliyotini taqdim etsa, albatta jamoasini o‘zgartirishini rasman tasdiqlagan edi.
Eslatib o‘tamiz, yarim himoyachi ushbu mavsumda Bundesliganing 22 ta uchrashuvida maydonga tushdi va o‘z hisobida 6 ta gol va 5 ta golli uzatmani yozib qo‘ydi.
Eriksen “Inter”ga o‘tganidan xafa
Milanning “Inter” klubi yarim himoyachisi Kristian Eriksen Milanga ko‘chib o‘tish fikri xato ekanligini tan oldi.
“El Desmarque” bergan xabarlarga ko‘ra, futbolchi “Tottenhem”ni tark etgani uchun qattiq afsus chekmoqda. Gap shundaki, agar u mavsumni “shporlar” safida yakunlaganida, “Real Madrid” safiga borib qo‘shilish imkoniyatiga ega edi.
Eslatib o‘tamiz, Eriksen “Inter” safida atigi 120 daqiqa harakat qildi va birorta foydali harakatni amalga oshirgani yo‘q.
“Benfika”dan rasmiy xarid
Portugaliyaning “Benfika” klubi Braziliyaning “Korintians” klubi yarim himoyachisi Pedrinoni o‘z safiga qo‘shib oldi.
Klub rasmiy sayti bergan xabarlaga qaraganda, “Benfika” 21 yoshli futbolchi uchun 20 million yevrodan voz kechishiga to‘g‘ri kelgan. Pedrino klub safida 1-iyundan boshlab harakat qilish huquqiga ega bo‘lib, tomonlar 5 yillik shartnomaga imzo chekishgan.
Eslatib o‘tamiz, avvalroq yarim himoyachining xizmatlari bilan “Barselona” va “Borussiya Dortmund” jamoalari qiziqqan, biroq Braziliya klubi o‘z futbolchisini Portugaliya klubidan boshqasi jamoaga sotmagan edi.
