«Monako» hujumchisi Stevan Yovetich Fransiya chempionatining 28-turi doirasida «Nissa»ga qarshi bo‘lib o‘tgan o‘yinda (1:2) maydondan chetlatilgan edi. Ushbu qoidabuzarlik uchun Fransiya professional ligasi tartib-intizom qo‘mitasi o‘yinchini 3ta o‘yinga chetlatish haqida qaror chiqardi.

Shu tariqa, Yovetich «Sent-Etyen», «Lill» va «Nant»ga qarshi uchrashuvlarni o‘tkazib yuboradi. Ammo bu o‘yinlar qachon o‘tkazilishi aniq emas. Boisi, Fransiya chempionati uchrashuvlari to‘xtatilishi mumkin. Avvalroq esa Liga 1 o‘yinlari 15 aprelga qadar tomoshabinlarsiz o‘tkazilishi haqida xabar tarqalgan edi.

Yovetich ushbu mavsumda barcha musobaqalar doirasida 13ta o‘yinda maydonga tushib, 2ta gol urdi va bitta golga uzatma berdi. «Monako» 28 turdan so‘ng 40 ochko bilan jadvalda 9-o‘rinda bormoqda.