Bugun bo‘lib o‘tgan AGMK va “Bunyodkor” o‘rtasidagi uchrashuvdan so‘ng, olmaliqliklarning ikkinchi goli muallifi Xojimat Erkinovni suhbatga tortdik.

– Bugun siz maydonga tushguningizga qadar tashabbus “Bunyodkor” tarafida edi. Qosimov sizni maydonda qanday vazifa bilan tushurdi?

– Asosiy vazifam qarshi hujumdagi keskinlikni oshirishdan iborat edi. Mirjalol Qo‘shoqovich mendan qanot himoyachilarining hujumga chiqishi uchun markazdagi himoyachilarni chetga “tortishimni” so‘radi. Shuningdek, ikkinchi zonadan uchinchi zonagacha bo‘lgan hududda pressing uyushtirishim talab etildi.

– Bugun maydonning u qadar yaxshi emasligi sababli o‘yin yakka kurashlarga boy o‘tdi. Sezgan bo‘lsangiz, AGMK yuqorida ham pastda ham to‘p uchun kurashlarda ko‘proq ustunlik qildi. Bu raqibning jismoniy imkoniyati bilan bog‘liqmi?

– O‘ylashimcha jismonan “Bunyodkor” bizdan kuchsiz emas edi. Shunchaki, e’tibor bergan bo‘lsangiz, ularda asosan yoshlar harakat qilishdi. Bizda tajribali futbolchilar ko‘proq edi. Bu yakunda o‘z so‘zini aytdi. Boz ustiga bugun o‘z maydonimizda harakat qildik. Muxlislarning ham qo‘llab–quvvatlashi qo‘shimcha kuch bag‘ishladi deb o‘ylayman.