Бугун бўлиб ўтган АГМК ва “Бунёдкор” ўртасидаги учрашувдан сўнг, олмалиқликларнинг иккинчи голи муаллифи Хожимат Эркиновни суҳбатга тортдик.

– Бугун сиз майдонга тушгунингизга қадар ташаббус “Бунёдкор” тарафида эди. Қосимов сизни майдонда қандай вазифа билан тушурди?

– Асосий вазифам қарши ҳужумдаги кескинликни оширишдан иборат эди. Миржалол Қўшоқович мендан қанот ҳимоячиларининг ҳужумга чиқиши учун марказдаги ҳимоячиларни четга “тортишимни” сўради. Шунингдек, иккинчи зонадан учинчи зонагача бўлган ҳудудда прессинг уюштиришим талаб этилди.

– Бугун майдоннинг у қадар яхши эмаслиги сабабли ўйин якка курашларга бой ўтди. Сезган бўлсангиз, АГМК юқорида ҳам пастда ҳам тўп учун курашларда кўпроқ устунлик қилди. Бу рақибнинг жисмоний имконияти билан боғлиқми?

– Ўйлашимча жисмонан “Бунёдкор” биздан кучсиз эмас эди. Шунчаки, эътибор берган бўлсангиз, уларда асосан ёшлар ҳаракат қилишди. Бизда тажрибали футболчилар кўпроқ эди. Бу якунда ўз сўзини айтди. Боз устига бугун ўз майдонимизда ҳаракат қилдик. Мухлисларнинг ҳам қўллаб–қувватлаши қўшимча куч бағишлади деб ўйлайман.