UYEFA yuzaga kelgan vaziyat tufayli Yevro-2020ni boshqa muddatga ko‘chirishga tayyor. Ammo ittifoq musobaqani kelasi yilga ko‘chirish evaziga klublar va Ligalardan 275 million funt miqdorida kompensasiya talab qilmoqda. Bu haqda"The Athletic" nashri xabar tarqatdi.

Manbaga ko‘ra, UYEFA Yevropa chempionatini 2021 yilga ko‘chirish uchun ketadigan xarajatlarni shunday summaga baholamoqda. Bugun bo‘lib o‘tgan yig‘ilishda tashkilot manfaatdor tomonlarga shunday summa haqida so‘z ochmoqchi.

Avval xabar berib o‘tilganidek, UYEFAga a’zo mamlakatlar vakillari, Yevropa klublari assosiasiyasi (ECA) va Professional futbolchilar xalqaro federasiyasi (FIFPro) videomuloqot orqali konferensiya o‘tkazadi va Yevro-2020ni ko‘chirish masalasida qaror qabul qiladi. Shuningdek, turnirni shu yilning dekabr oyida o‘tkazish varianti ham mavjud.

Bundan tashqari, 17 mart kungi majlisda to‘xtab qolgan Yevropa chempionlar ligasi va Yevropa ligasining qolgan qismini o‘tkazish masalasi ham muhokama qilinadi.

Klublar va Ligalar qanday qilib bo‘lmasin ushbu mavsumni yakunlab qo‘yishni niyat qilishmoqda. Chempionatni oxiriga yetkazmasdan, hozirgi holatda g‘olibni e’lon qilish esa juda ko‘p muammolarni yuzaga keltirib chiqaradi.