УЕФА юзага келган вазият туфайли Евро-2020ни бошқа муддатга кўчиришга тайёр. Аммо иттифоқ мусобақани келаси йилга кўчириш эвазига клублар ва Лигалардан 275 миллион фунт миқдорида компенсация талаб қилмоқда. Бу ҳақда"The Athletic" нашри хабар тарқатди.

Манбага кўра, УЕФА Европа чемпионатини 2021 йилга кўчириш учун кетадиган харажатларни шундай суммага баҳоламоқда. Бугун бўлиб ўтган йиғилишда ташкилот манфаатдор томонларга шундай сумма ҳақида сўз очмоқчи.

Аввал хабар бериб ўтилганидек, УЕФАга аъзо мамлакатлар вакиллари, Европа клублари ассоциацияси (ECA) ва Профессионал футболчилар халқаро федерацияси (FIFPro) видеомулоқот орқали конференция ўтказади ва Евро-2020ни кўчириш масаласида қарор қабул қилади. Шунингдек, турнирни шу йилнинг декабрь ойида ўтказиш варианти ҳам мавжуд.

Бундан ташқари, 17 март кунги мажлисда тўхтаб қолган Европа чемпионлар лигаси ва Европа лигасининг қолган қисмини ўтказиш масаласи ҳам муҳокама қилинади.

Клублар ва Лигалар қандай қилиб бўлмасин ушбу мавсумни якунлаб қўйишни ният қилишмоқда. Чемпионатни охирига етказмасдан, ҳозирги ҳолатда ғолибни эълон қилиш эса жуда кўп муаммоларни юзага келтириб чиқаради.